MASOLE A LELEKOA NUL

MASOLE A LELEKOA NUL 

Ka moqolotsi oa rona

La 26 Tšitoe 2023

Liofisiri tse kholo tsa sesole li tlalehoa li thibetsoe ho fana ka thuto (lecture) ho baithuti Sekolong se Seholo sa Sechaba (National University of Lesotho ka la 21 Ts’itoe 2023. Mehloli e boneng litaba tsena ka mahlo ha li etsahala e re e bile pono e soabisang ha liofisiri tse kholo tse kenyelletsang Major General ‘Matumelo Ramoqopo, li lelekoa joalo sekolong sa sechaba. Molaoli oa Sesole, Lieutenant General Mojalefa Letsoela le eena o tlalehoa a ne a lebelletsoe ho fihla sekolong moo ha moifo oa hae o khutlisoa.

Ho ea ka e mong oa baithuti ba molao NUL, morupeli oa bona Lefapheng la Molao, ‘M’e Mothepa Ndumo o ile a hlophisa ‘moka moo a neng a memme ofisiri ea sesole e tummeng ka ho ngola libuka, Second Lieutenant Bothata Kennedy Silase ho ea fana ka thuto ea sehlooho (keynote address) ‘mokeng oo ka la 21 Tšitoe 2023 hona NUL. Thuto ea Silase e ne tlo ba holima boetapele malebana le litaba tsa bophelo ba sechaba le moruo tlasa mohoo o reng “Harnessing Hope Beyond.”

Ho utloahala Second Lieutenant Silase a fihlile NUL ka letsatsi le boletsoeng a itlhophile. Ba boneng ketsahalo ba re o ne a felehelitsoe ke liofisiri tse ling tse kholo tsa sesole joaloka Major General ‘Matumelo Ramoqopo. Ke moo ba ileng ba tebeloa mapatlelong a sekolo ha ‘moka o lokela ho tsoela-pele ebile bamemuoa ba se ba le teng.

Ho sa le joalo, Leihlo la Basotho News le bone lengolo la imeile la Mookameli oa NUL (Vice-Chancellor) Prof. Olusola Isaac Fajana moo a neng a tsebisa mohlophisi oa mokete (Ndumo) hore Lekhotla la NUL le entse qeto ea ho thibela sesole ho bua ‘mokeng oo mapatlelong a sekolo.

Lengolo la Fajana le baleha ka tsela ena: “‘M’e Ndumo, ke masoabi haholo, ka bomali-mabe maobane Lekhotla la Sekolo le bile le kopano, moo ke ithutileng hore Lekhotla le fetisitse molao (standing order) o thibelang sesole ho bua (kapa ho fana ka thuto) ho mang kapa mang NUL. Taba ena e potlakile, mohlomong u ka fetola sebaka sa ‘moka kapa oa chechisa ‘moka.” Le rialo lengolo le neng le ngolletsoe mohlophisi oa ‘moka – Ndumo.

Thibelo ea litho tsa sesole ho fana ka thuto kapa ho bua NUL e tla kamora puo e ileng ea fetisoa ka kopanelo ke baokameli ba litsi tsa tšireletso – Lieutenant General Mojalefa Letsoela oa Lesotho Defence Force, Monghali Holomo Molibeli oa Lesotho Mounted Police Services, le Monghali Pheello Ralenkoane oa National Security Services ka la 16 Mphalane 2023. Mona baokameli ba ne ba thibela maparamente ho liha ‘muso ka paramenteng ka ho fetisa tšisinyo ea ho hloka tšepo ho tona-kholo Sam Matekane le ‘muso oa hae.

Polelo ea baokameli ba litsi tsa tšireletso e ne e re: “Sechaba sa Basotho se buile ka nako e telele hore se rata puso ea sechaba ka sechaba, e seng puso ea maparamente molemong oa maparamente, kahona, sechaba se khabane, re le tsebisa hore liketsahalo tseo tsa phetolo ea puso (ka paramenteng), li ke ke tsa phethahala.” Molibeli o ne a rialo a bua a tehetsoe hare ke Letsoela le Ralenkoane ba hlahile Thelefishining ea Naha (LTV). Litaba tsa polelo eo li ka baloa 👉🏼MONA.

Thibelo ea LDF ho bua NUL e susumelitsoe ke Mokhatlo oa litsebi le barutehi NUL – Academic Forum for Development of Lesotho (AFDeL), o neng o lokolle polelo o tseka hore molaoli oa sesole, Lieutenant General Letsoela a thibeloe ho fana ka thuto moo a neng a menngoe ke NUL ka la 7 Tšitoe 2023. Leha ho le joalo, Letsoela o ile a tsoela-pele ho fana ka thuto. Bala litaba tsa thuto eo mona 👉🏼THUTO.

Ntlha-kemo ea AFDeL ke hore polelo ea baokameli ba litsi tsa tšireletso e ne e tšosa ka ho liha ‘muso kaha e tsitlalla hore Molaoli oa Sesole le bo-mphato’ae ba robile litšiea tsa puso ea sechaba ka sechaba ka ho ntša polelo e neng e kena-kenana le mosebetsi oa maparamente kaha e re maparamente a ne a phethahatsa lipallo tsa molao oa motheo ho hlahlela tšisinyo ea ho hloka tšepo ho ‘muso.

AFDeL e re ho bonahala Letsoela a sa sireletse litšiea tsa puso ea sechaba ka sechaba tseo a neng a lokela ho li sireletsa hammoho le ho sireletsa molao le khutso ekasitana le molao oa motheo oa Lesotho. Mokhatlo oa barutehi o boetse o totobatsa hore ho lumella LDF ho fana ka thuto NUL ke ho nyelisa pono ea NUL ka boetapele bo tsoileng matsoho. Litaba tse felletseng ka polelo ea AFDeL li 👉🏼 MONA.

“Memo ea hae (Letsoela) e tlisa leru le letšo le ho thunthetsa boleng ba litšiea tse ntle tsa boeta-pele.” Lengolo la AFDeL le neng le ipiletsa hore memo ea Letsoela e hlakoloe le baleha joalo.

Ho sa le joalo, ‘M’e Ndumo o hlaloselitse moqolotsi oa Leihlo la Basotho News hore o sa le phomolong hajoale ‘me o tla bua ka litaba tsena selemong se tlang feela o re tlo nkela taba ena likhato tsa molao.

Phala ea sesole, Lieutenant Colonel Sakeng Lekola eena o bontšitse a sa tsebe letho ka ho thibeloa hoa litho tsa sesole NUL.