MARIKURUTI A CHESA MOPHATO
Ka Moipone Makhemeng
La 17 Phuptjane 2023
Ke marikuruti a 256 a chesitseng mophato mapatlelong a Police Training College (PTC), Maseru maobane. Marikuruti ao a koetlisitsoe bolele ba selemo le khoeli. Baeti ba bohlokoa e bile Tona-Kholo Sam Matekane, Letona la Puso ea Libaka, Borena, Litaba tsa Lehae le Sepolesa, Lebona Lephema, matona a mang le mookameli oa sesole.
Mookameli oa PTC, DCP Bohang Lintle Phasumane o bontšitse thabo e khaphatsehang ha bao ba chesa mophato. Puong ea hae o supile hore mapolesa ana lehoja a tsoa a le 296 kajeno, a fihlile a le 300. O itse baithuti bana ba fihlile ba sa tsebe letho empa kajeno ke tlotla e kholo hore ba phethetse koetliso ka bokhabane. O hlalositse hore ona ke mokhahlelo oa koetliso oa pele oa ho nka nako e telele haholo.
DCP Bohang Lintle Phasumane, mookameli oa PTC
Ha a tsoela-pele, o lotomantse lithuto tseo ba li rutang mapolesa ekasitana le likoetliso tseo ba Ii fumaneng tse etsang hore ebe o ema ka phatla e phahameng hore ba tla etsa mosebetsi o tsoileng matsoho hang hoba ba kene sechabeng.
Har’a lithuto tseo a reng ba li fuoe, ke semelo sa setsi sa sepolesa le melao, tlhompho ea litokelo tsa botho le puso ea molao. Ba boetse ba rutuoe leano la taolo ea botlokotsebe, mekhoa ea lipuisano ho babelaelloa le taolo ea sechaba.
DCP Phasumane o bontšitse hore har’a liqholotso tseo ba tobaneng le tsona nakong ea koetliso, bothata bo boholo e bile litlhoko tsa mantlha. Ha a hlalosa o li behile tjena: “Re ne re hula ka thata ‘me ho ne ho se bonolo. Lisebelisuoa e bile qholotso ‘me ke lakatsa re mpe re lokisetse ba tlang kaha bana ba hutse ka thata. Tlala le eona e ne e le boima empa ka lehlohonolo seratsoana sa meroho sa sekolo se ile sa re thusa ‘me ra tsoelella.”
Ha a thetha o ile a fana ka keletso ho mapolesa a macha, a bontša hore ba se iphumane ba nka litsela tse khaoletsang bophelong. A re ba itlhomphe kamehla le ho lula ba koetlile ‘me ba se khaotse ho rapela.
Mookameli oa sepolesa, Holomo Molibeli ka tsela e tšoanang o lebohisitse mapolesa ana. A hlalosa hore litereke tse tharo, Qacha’s Nek, Mokhotlong le Thaba-Tseka li fuoe mapolesa a 50 setereke ka ‘ngoe kaha ho na le palo e tlaase ea mapolesa moo. Ke puong ea hae moo a lomollotseng hore tse ling tsa likatleho tseo ba li fihletseng e le mapolesa ke ho fumana babolai ba moqolotsi oa litaba, Ralikoenelo Joki ea ileng a bolaoa ka la14 Motšeanong 2023. O tiiselitse sechaba hore bao ba tlo tšoaroa ba hlahisoe makhotleng haufi. O bile a etsa boipiletso hore bao ba se fuoe beili.
Ho feta mona Molibeli o ile a phatlalatsa mokhoa oa tšebetso o mocha nakong e tlang. O itse: “Ha lichelete li lumela ntate tona-kholo re batla mapolesa ano ha a le tseleng mane, re a kenye lik’hamera sefubeng mona (body camera), k’hamera eno e tla mo hatisa hore na o ntse a etsang.” Molibeli o hlalosa hore ke oona mokhoa oo ba tlo tšoara mapolesa a batlang tjotjo ho sechaba ka oona.
O ile a hlalosa hape hore ba entse selekane le sepolesa sa Rwanda. A re moralo oa bona ke hore ho be le mapolesa a Lesotho a eang Rwanda ebe a Rwanda a tla Lesotho ka phapanyetsano ea boithuto ba tšebetso.
Boha menyakoe ea marikuruti ka tlaase:
Menyakoe ea marikuruti
Menyakoe ea marikuruti
Sechaba se neng se tlile moketeng, PTC
Menyakoe ea marikuruti
Menyakoe ea marikuruti
Menyakoe ea marikuruti
Menyakoe ea marikuruti
“Re se re kentse taba ena tšebetsong kaha re na le lepolesa la boemo ba Senior Superintendent, hajoale le Rwanda mane le tla chesa mophatho ka la 30 Phuptjane 2023 ‘me o ne a etsa lengolo la Masters kolecheng ea sepolesa sa Rwanda (Rwanda National Police College). Rwanda mono sepolesa se ntša mapolesa a boemo ba li-Masters ba rutoa sepoleseng.
Le rona mona Lesotho, re rata ho e fihlela taba eno. Ke rata ho phatlalatsa hore re se re entse maqhama le National University of Lesotho (NUL). Re lakatsa ho bona ba tla kena kamora bana, manane a rona a thuto a be a le tlas’a tataiso ea National University of Lesotho ebile e tlo re thusa hore re fumane accreditation.
“Le se hlole le e bua taba ena ea hore re-Ma Form 5.” O rialo.
Ho sa le joalo, Letona la Puso ea Libaka, Borena, Litaba tsa Lehae le Sepolesa, mohlomphehi Lebona Lephema o ile a lebohisa mapolesa a macha ka ho phethela boithuto ba bona. O boetse o etsa thapeli hore lerato la naha le bonahale matsohong a bona. O ile a re ba behe Lesotho le Basotho pele ‘me a ba lemosa hore ba tsoa nako eo litlolo tsa molao li behileng bophelo ba sechaba tsietsing.
Lephema o hlalositse hore ‘muso o ikemiselitse ho loantša botlokotsebe ka tsohle tseo ba nang le tsona. A supa hore sena se ka fihleloa ha ho ka kenoa ka sekhahla ke bohle ba nang le seabo. Ha a qetella o totobalitse tšepo ea hae ho mapolesa a fihlang hammoho le a khale hore a tla fenya botlokotsebe.
Lebona Lephema
Khabareng, Tona-Kholo Matekane o ile a fana ka puo e le molaetsa o moholo oa ho laea ba neng ba chesa mophato. ‘Me litaba tsa hae o ile a li beha tjena;
“Ha rea lebella ho utloa le se le balelloa hara litloli tsa molao tse akhang baji ba litjotjo, tlhekefetso le litlolo tse ling tsa moalo. Ho ea soabisa hore ba loketseng ho thibela botlokotsebe ebe ke bona ba bo etsang.
Tona-Kholo Sam Matekane o khalema mapolesa ho batla sechaba tjotjo
‘Muso o hlokometse litlhoko tsa lisebelisoa ka hare ho sepolesa ‘me re ntse re hlophela ho bona hore li’a fumaneha. Re batla ho sebeletsa maemong a nepahetseng e le ho le thusa ho fihlela tšebetso ea lona.” Kamora puo ea Tona-Kholo ho ile hoa cha mok’hukh’u hoa sala masenke. Mokete o ile oa natefisoa ka metsamao ea sepolesa, mohobelo, liphotha le lipapali tse ling ‘me hoa utloahala mehoo le melilietsane.
