MAPOLESA A LESOTHO A TŠOAROA RSA LE KOLOI EA SEPOLESA
La 17 Tlhakubele 2024
Ka moqolotsi oa rona
Litho tsa sepolesa sa Lesotho tse tharo li tšoere Wepener, Foreistata li tsamaea ka koloi ea sepolesa ea moetso oa Honda Fit, ea linomoro-polata tsa POL-0060. Mapolesa ao a tšoeroe le Basotho ba babeli ka Labone mantsiboea.
Mapolesa ke a latelang: Detective Sergeant Bokang Phekoli (36) LMPS Force No. 71603, Sergeant Mashiea Senaba (52), LMPS Force No. 9204 le Sergeant Pakiso Ntsoele (40), LMPS Force No. 29711.
Mapolesa a ne a palamisitse Basotho ba se nang lipasa e leng ‘Maralebeletse Bernadina Tlai-Tlai (31) le Khosane Tšotetsi (39).
Mapolesa a RSA a re a ile a sala koloi eo ea sepolesa sa Lesotho e neng e paitsa mabone a maputsoa a sepolesa ho tloha ha e tšela lelibohong la Van Rooyen, Mafeteng e leba Wepener.
Honda Fit ea sepolesa e ile ea emisoa ‘me hoa botsoa baqhobi ba eona hore na ke bo-mang? Ba batlang haeka ba bile ba paitsa mabone a maputsoa naheng eo e seng ea bona ntle le tumello. Ke moo mapolesa a Lesotho a ileng a itlhalosa a setse morao mohlala oa liphoofolo tse utsuoeng ka Lesotho. Sepolesa sa Afrika Boroa se ile sa batla tokomane e ba lumellang hore ba naheng ea Afrika Boroa ka tšebetso ea sepolesa empa bao ba hloleha ho fana ka letho.
Leha ho le joalo, mapolesa a Lesotho a ile a hlahisa litokomane tsa ‘ona tse a pakang hore ke litho tsa sepolesa sa Lesotho ntle le Sergeant Pakiso Ntsoele ea ileng a hlahisa ID ea naha feela.
Koloi, mapolesa le batho bao ba tšoeroe ‘me ba koalloa setokising sa sepolesa sa Wepener le lithunya tsa mapolesa tsa moetso oa 9mm hammoho le mahlahlela a tsona.
Babelaelloa ba tla hlaha khotla haufi ka qoso ea ho tsamaisa le ho kenya batho ba se nang lipasa Afrika Boroa ka thoko ho molao. Sepolesa sa Afrika Boroa se boetse se re mapolesa a Lesotho a ne sa se na tumello ea ho etsa mosebetsi oa bopolesa naheng ea Afrika Boroa hape ba hlolehile ho hlahisa mangolo a lithunya tseo ba neng ba li tšoere.
