M1.1 MILONE E UTSUOENG ECONET E’A FUMANOA
Ka Moipone Makhemeng
La 10 Pulungoana 2023
Monna oa Mafeteng, oa mohlobo oa Mo-India, Walim Ashraf o ne a hlahe lekhotleng ka pele ho ‘maseterata Lerato Ntelane oa Maseru a qosoa ka bosholu ba bomenemene ba chelete e kaalo ka M7,298,071.34 ea k’hamphani ea mehala, Econet Telecom Lesotho ka la 22 Phato 2023.
‘Maseterata Lerato Ntelane [Image supplied]
Walim Ashraf o qosoa ka bosholu ba M7 milone ea Econet
Chelete e ne e le ea theko ea motlakase ka Ecocash ‘me Econet e ne e tlameha ho e lefa ho LEC e le chelete ea khoeli ea Motšeanong 2023. Qoso e re Ashraf o ile a ikhakanya samokana-eka ke mohiruoa oa LEC eaba o fana ka leseli la leshano ho Econet a re nomoro ea polokelo moo chelete e lokelang ho kenngoa LEC e fetohile.
O tlalehoa a ile a fana ka nomoro ea hae ea banka, ‘me a etsa hore Econet e hohlometse bokhotho-khotho ho eena. Bala taba tsena ka botlalo 👉🏾 MONA.
Ho sa le joalo, maoba letona la lichelete le meralo ea ntšetso-pele, Dr. Retšelisitsoe Matlanyane o tlalehetse ntlo ea bakhethoa ba sechaba hore holim’a chelete e M7,298,071.34 e utsuoeng Econet, Setsi sa Toantšo ea Bobolu le Bomenemene (Directorate on Corruption and Economic Offences – DCEO) se atlehile ho fumana feela M1.1 milone ea chelete ena.
“Tšebetso ea rona ho ntlafatsa moruo oa naha ka boima e tlokotsing ka lebaka la bobolu bo itšemmeng. Re hloka ho nka likhato tse potlakileng ho loantša bothata bona. Lefapha la rona la toantšo ea bobolu le fihletse likatleho tse toma ho kenyelletsa ho fumana chelete e M1.1 milone e le karolo ea M7 milone e neng e utsuoe Econet.” Dr. Matlanyane o rialo.
Matlanyane o boetse a beha ntlo leseling hore DCEO hape e atlehile ho fumana le ho khutlisetsa M5 milone ‘musong oa Lesotho e le karolo ea M54 milone e ileng ea utsuoa ke masholu lekaleng la lichelete ka 2021.
Leihlo la Basotho le buisane le raliphatlalatso oa Econet, ‘Mateboho Masoabi ho utloa hore na k’hamphani ea habo e se e amohetse M1.1 milone e fumanoeng ke DCEO. “Ka lehlakoreng la rona taba ena e sa le bopaki makhotleng ‘me chelete eo ha e-s’o be ho rona. Kahona ha ho letho leo re ka le buang.” Masoabi o rialo.
Ho sa le joalo, Ashraf o lokollotsoe ka beile ea M500 000 le ho beha M1 milone paneng.
