LNDC E TSOELA-PELE HO QAOLLA ENRICH
Ka Matlhohonolofatso Lebesa
La 15 Tšitoe 2023
Letona la Likhoebo le Mesebetsi e Meholo, Mokhethi Shelile, o phatlalalitse hore lekala la habo le mothating oa ho phethela morero oa ho qaolla lebenkele la Basotho le maqakabetsing la Enrich Stores.
Shelile a bua ‘mokeng oa baqolotsi maobane o itse Enrich Stores e tla qaolloa mathateng a eona a lichelete a qobelletseng hore e koaloe ke Koparasi ea Ntšetso-pele ea Moruo (Lesotho National Development Corporation – LNDC).
Mokhethi o teketse baqolotsi hore ha se ‘nete hore ‘muso o hlanohetse tšepiso ea ho thusa lebenkele leo. O hlakisitse hore bona e le ‘muso ka LNDC ba tlo thusa lebenkele feela e seng Setsi sa Boikoetliso sa Enrich (Enrich Fitness – Gym). Shelile o hlalositse hore setsi sa Enrich sa boikoetliso (Enrich Fitness) sona ha se ea kenella tumellanong ena, ‘me ba fella ho thusa lebenkele feela. Sena se bolela hore gym e ntse e tlo fantisoa ke lekhotla.
Enrich Fitness eona ha e tlo thusoa ke ‘muso
“Ke mpe ke hlakise hore ‘muso kapa koporasi ea LNDC ha o e-s’o etse qeto ea ho hlanohela Enrich. Litaba tsa eona li ntse li le tšebetsong; li ntse li shejoa hofihlela li phetheloa.
“Ke maobane ha LNDC e kopane le litsebi ho sheba hore na litaba tsa Enrich li tla sebetsoa joang hore li tsamaee joalo ka khoebo.” Ho rialo Shelile. A tsoela-pele ho supa hore thuso ena e tlo kenyeletsa hore LNDC e kene kahara tsamaiso ea Enrich ho bona hore lebenkele leo le tsamaisoa ka nepo.
Mokhethi Shelile, Letona le Khoebo le Mesebetsi e Meholo
“Re tla tlameha hore re bone hore rea tiisa ka tsamaisong ka mono. Ha re lokolla chelete re tla tlameha ho bona hore re patala bao ba ntseng ba emetse hore ba lefshoe.
“Thuso ena ke sekoloto ke hle ke hlakise; Enrich e tlile ho LNDC hore e thusoe. Ke tokelo ea Mosotho e mong le e mong ho kopa thuso litabeng tsa khoebo.” Shelile o tsoela-pele ho hlalosa. A boela a supa hore ba phethetse litlhahlobo ho se ho setse hore ba phethele litumellano.
Ho sa le joalo, mookameli oa LNDC, Adv. Molise Ramaili o thatisellelitse litaba tsa letona ka hore ba bile lipuisanong le Enrich nako e telele. “Ha e le hantle, mosebetsi oa rona o moholo ke ho sheba likhoebo tse kholo, le ho bona hore re thusa Basotho joang ba keneng kahare ho likhoebo tse joalo.” Ho rialo Ramaili.
A re LNDC e buletse Mosotho e mong le e mong ho tla kopa thuso litabeng tsa kholiso ea likhoebo. O hlalositse hore ha ba thusa khoebo ba sheba lintlha tse ‘maloa ho sheba hore na motho ea joalo o lokeloa ke thuso kapa che.
A tsoela-pele hore tumellanong le Enrich ba ipapisitse le hore LNDC e tlo ba molekane oa nakoana le Enrich khoebong ebe kamora lilemo tse supileng ba arohana moo LNDC e tla boelloa ke chelete ea eona ‘moho le liphaello.
“Ho hlokomelehile hore ha ho na botsebi kahare ho naha ba ho tsamaisa khoebo ea mofuta ona oa Enrich e leng se bakileng ho putlama hoa eona. Re le LNDC re tlo bona hore re kenya botsebi botsamaising ba Enrich.” Ramaili o teka litaba.
A re ba ithutile hore ho na le lintho tse ngata tseo ba tlamehang ho tla li tsitsisa ka hare ho tsamaiso ea Enrich, e leng botsamaisi ho tloha botong ea tsamaiso ho ea ho bookameli. A re LNDC e tlo ba karolo ka ho kenya litsebi ekasitana le hore ba tsebe hore na thepa e latoa kae ka litjeo tse tlaase e tsebe ho etsa phaello, e leng ntho eo Enrich e neng e sa e etsa.
“Re shebile hore na re tlo thusa Enrich joang hore moo e rekang e reke thepa ka bongata ka litheko tse tlaase.” O rialo Ramaili.
A re taba e ‘ngoe e nonyelitseng Enrich ke hore e ne e sebelisa chelete e ngata haholo ho phetha tšebetso ea letsatsi le letsatsi ‘me seo se ne se kena-kenana le phahello ea eona. A re ka hara moralo oa bona ba na le moralo oa ho tla sebetsa le mafapha a fapaneng hore ba holise khoebo le ho holisa Basotho ho kena khoebong ba tsebe ho bula mesebetsi.
