LITJEO TSA LIKOLOI TSA SEPOLESA LI’A HLALOSOA
La 3 Pulungoana 2023
Ka moqolotsi oa rona
Setho sa Ntlo ea Bakhethoa sa Khekhethane ho tsoa mokheng oa Basotho National Party (BNP), Machesetsa Mofomobe o ile a botsa potso ka paramenteng mabapi le theko ea likoloi tsa sepolesa tsa moetso oa Honda Fit le Mahindra.
Likoloi tsa moetso oa Mahindra tsa sepolesa
Lipotso tsa Mofomobe li ne li batla hore letona la Puso ea Libaka, Borena, Litaba tsa Lehae le sepolesa le fane ka leseli mabapi le tse latelang; letona le hlalose hore na kabo ea mosebetsi oa theko ea likoloi tseo e entsoe ka tsela ea mofuta ofe.
O boetse o ne a batla hore letona le bolele hore na ke k’hamphani efe e abetsoeng ho reka likoloi tsena. O boetse o ne a lakatsa hore letona le hlalosetse ntlo e khabane hore likoloi li rekiloe ka bokae. Ntlha ea ho qetela Mofomobe o ne a batla hore letona le hlalose hore na likoloi tsa moetso oa Honda Fit li ncha kapa joang.
Likoloi tsa moetso oa Honda Fit li rekiloe ka M50 000 kaloi ka ‘ngoe
Ho sa le joalo, letona la lipapali Pitso Lesaoana o ile a Arabella letona la sepolesa ka tsela ena: “Bahlomphehi ba ka, thekong ea likoloi tsena ho sebelisitsoe mofuta oa theko oo re batlileng k’hamphani e tlo re thusa (single source tender method) ho reka likoloi tsa sepolesa tsa moetso oa Mahindra tsa li-van le tsa moetso oa Honda Fit.
“Sena se entsoe ho ipapisitsoe le molao oa theko ea thepa ea ’muso oa 2023 temana ea 101 (F) (G) hammoho le temana ea borobeli (A) bakeng sa theko ea li-Honda Fit.” Lesaoana o hlalosetsa ntlo.
Lesaoana o hlalositse hore mosebetsi oa theko ea likoloi o fuoe k’hamphani ea Smith Auto Group PTY Ltd ho reka likoloi tsa Mahindra athe Metro Cars ARM PTY Ltd e ile ea fuoa mosebetsi oa ho reka likoloi tsa moetso oa Honda Fit.
Letona Pitso Lesaoana, o fana ka leseli mabapi le theko ea likoloi tsa sepolesa [Image LNBS]
Ha a arabela potso ea ho qetela, Lesaoana o itse likoloi tsa moetso oa Honda Fit tsona ha li ncha , a re ke li-second hand.
Ho sa le joalo, letona le ile la botsoa hore na le bona eka likoloi tse seng ncha li lebelletsoe ho phela nako e kae . H’a araba potso eo Lesaoana o itse ha a boemong ba ho hlalosa hore na li tla phela nako e kae, a re Basotho ba se ntse ba sebelisa likoloi tsa mofuta ona ‘me ba tseba hore na li phela nako e kae.
