LITHOTSELA LI NYAMELA KA M116,733 EA MACHONISA
Ka Moqolotsi oa rona
La 7 Phuptjane 2023
Baqosuoa ba bararo Rorisang Lekopa (35) oa Naleli Ha Rasetimela, Berea, Mlungisi Sekete (35) oa Ha Mabote, Berea le Mohapi Mohapi (27) oa Ha Pita, Maseru ba hlahile kapele ho ‘Maseterata oa Maseru, Nthabiseng Moopisa kajeno ba qosoa ka ho ikhapela ka bolotsana le bomenemene chelete ea k’hamphani e kalimanang ka chelete ea mofumahali Motena Lishea oa k’hamphani ea Tšepo Financial Services LTD. Moqosuoa oa bone, Pitso Mabote (27) oa Ha Mabote, Berea esale a baleha. Baqosuoa ba hlahileng khotla ba beileng.
Ho ea ka lengolo la qoso, qoso ea pele e re, lipakeng tsa la 1 Phato 2018 le 30 Mphalane 2018 ka morero o tšoanang le ka maikemisetso baqosuoa Mlungisi Sekete, Pitso Mabote le Mohapi Mohapi ba ile ba kopa mekitlane ka ho fana ka litokomane tsa lefofo tse akhang ‘pay slips’ tse neng li supa ha li tsoa k’hamphaning ea THESCO eo paki e hlahileng lekhotleng kajeno e boletseng ha e ne e le k’hamphani ea lefofo ea maiqapelo feela. Bomenemene qosong ea pele bo entse hore Tšepo Financial Services e lahleheloe ke M83 774.28.
Qoso ea bobeli; baqosuoa ba boetse ka morero o tšoanang le maikemisetso ba kopile mekitlane ka ho nehelana ka payslips tsa lefofo ba bontša ba sebetsa k’hamphaning ea Letsoabo Construction & Civil eo le eona e hlalosoang e le k’hamphani e sieo.
Boqhekanyetsing bona ba ile ba fuoa kakaretso ea mokitlane e kaalo ka M32 958.98. Kakaretso ea chelete eo ba e qhekanyelitseng Tšepo Financial Services ke M116,733.26.
Kajeno ho hlahile paki ea bobeli ka pele ho lekhotla, Motebang Sehloho (36) oa Roma Mahlanyeng.
O hlalositse a ne a sebetsa Tšepo Financial Services ka 2018. Ha a botsoa ke bochochisi hore na o tseba baqosuoa ba kapele ho lekhotla o ile a supa a tseba moqosuoa oa pele, Rorisang Lekopa le Mohapi Mohapi. A re o tsebile Lekopa hoba e ne e le e mong oa baokameli Tšepo Financial Services athe Mohapi o mo tsebile hoba a ne a felehetsa basebetsi ba k’hamphani ea Mahlabatheng Construction le Letsoabo Construction.
Paki e ile ea teka bopaki joana: “Ka la 29 Loetse 2018, re le ofising ea Tšepo Finacial Services ‘m’e Rorisang o ile a ntša litokomane kahara faele. Litokomane tseo e ne e le salary deduction agreement forms tse neng li tlatsuoe ebile li tempuoe ka litempe tsa lik’hamphani tse hlalositsoeng.
Baqosuoa, Rorisang Lekopa, Mlungisi Sekete le Mohapi Mohapi 2
“Liforomong moo ho ne ho tlatsa batho ba lik’hamphani le Tšepo Finacial Services. Moo ho tlatsang Tšepo Financial Services o ne a se ntse a tekenne eaba o nkopa hore ‘na ke saene ka tlaase.
“Kamora ho saena, tokomane e ile ea romelloa ho ‘me Motena Lishea. Ho tloha moo, kamora matsatsi ho ile hoa fihla batho ba bararo ba tsoa k’hamphaning ea Mahlabatheng ba bontša ba romeletsoe ho tla nka mekitlane.
“Litokomane tseo ba neng ba li tšoere e ne e le ID, payslips le mangolo a bontšang hore ba hiruoe k’hamphining eo. Ke ile ka thusa a le mong, ea ileng a nka mokitlane oa M5000. Ka matsatsi a hlahlamang ho la ‘na fihla basebetsi ba tsoang Mahlabatheng le Letsoabo Construction
“Kamora nakonyana, e ‘ngoe ea lik’hamphani tsena e ile ea sitoa ho patala mekitlane ea basebetsi eo ba neng ba e nkile. Kamora moo, mookameli ‘m’e Motena o ile a re ho tšoanela ho etsoe lipatlisiso ka likhamphani tsena tse ikemetseng. Ke ile ka fumana mohala o tsoang ntlo-kholo ea sepolesa ho thoe ke itlalehe.
Motebang Sehloho, paki ea bobeli
“Mapoleseng ke ile ka botsoa hore na ke tseba ‘m’e Rorisang le hore na ke tseba lik’hamphani tsa Letsoabo, Mahlabatheng le THESCO. Ka botsoa hape hore na lik’hamphani tseo ke li tseba joang le hore na ke ile ka fihla moo li sebeletsang. Ke ile ka re re ne re qetelle re sa fihla moo li sebeletsang empa ra fuoa litokomane tsa teng ke ‘m’e Rorisang.” Paki e rialo.
Mochochisi o ile a botsa paki hore na e ile ea bona ka mahlo batho ba neng ba il’o kopa mekitlane ‘me eona ea re: “Batho bao ke ba tsebile ha ba fihla ka ofising. Ka bokhutšoane ke batho bao ke neng ke sa ba tsebe, ke ne ke qala ho ba bona, hape ho ile hoa fihla batho ba bangata.” Paki e ea hlalosa.
Mochochisi o ile a fa paki patanta ea litokomane tsa batho ba ileng ba kopa mekitlane ‘me a kopa paki hore e bale mabitso a batho bao le litokomane tseo ba faneng ka tsona ha ba kopa mekitlane.
Mabitso a batho bao e bile; Lepele Michael Ntlobo le Mabusetsa Seleso ba hlalosoang ba ne ba sebetsa Letsoabo Construction.
Tumelo Mpanya, Molefi Rangoanana, Nomalang Pata le Mokhele Tšolo bona ba ne ba tsoa THESCO. Paki e ile ea bolella lekhotla hore litokomane tseo e ea li tseba.
Adv. Khosi Lesuthu, muelli e mong oa baqosuoa
Pele lekhotla le khefutsa paki e ile ea hlalosa hore ho ile hoa sibolloa se belaetsang lik’hamphaning tsena ha li bapisoa le tsa khale. Payslips li ne li tšoana hape le mongolo o ne o tšoana le ka botenya.
Ho sa le joalo, akhente ea baqosuoa Lekopa le Mohapi, Adv. Lesuthu o ile a botsa paki hore e hlalose hore na baqosuoa ba qosoa ka eng hore a hlakeloe: “Ho thoe lik’hamphani tseo ba faneng ka tsona ke tsa lefofo. Hape ha ho etsoa lipatlisiso ho fumanoe batho bao ba fuoeng mekitlane e se batho ba teng, ke batho ba lefofo le bona.”
Adv. Lesuthu o ile a botsa paki hore na batho bao ha ba ka ba fihla kapel’a bona ba nka chelete ‘me paki ea lumela hore ba ile ba fihla.
Adv. Lesuthi o ile a re k’hamphani e ka ba ea lefofo empa batho bona ba tlile ho nka chelete, ba fihla ba nkile li-ID e le batho ba phelang. Paki e ile ea lumela hore ho joalo feela ke batho bao e neng e qala ho ba bona. Adv. Lesuthu: “Joale batho bao ba kae?” Paki: “Kannete ke tla sitoa ho itlama hore na ba kae.” Adv. Lesuthu: ” Empa batho bao ba siile linomoro tsa bona le ID tsa bona – lintho tsohle. Paki e itse ha e tsebe hoba e ne e se boikarabello ba eona ho shebana le batho ba hloloang ho lefa mekitlane.
Nyeoe e tla tsoela-pele letsatsing le tla phatlalatsoa.
