LITHO TSA SEPOLESA LI QOSOA KA HO UTSOA LITHUNYA
Ka Moipone Makhemeng
La 1 Phato 2023
Litho tse peli tsa sepolesa sa Lesotho, Police Constable Poloko Lehoko (31) oa Roma, Ha Kholoko motseng oa morena Mitchell Maama le Police Constable Sempe Theko (29) oa Thaba Bosiu, Ha Tjopa ha morena Khoabane Theko ba hlahile lekhotleng la ‘masetereta oa Maseru maobane ka la 31 Phupu 2023 ba qosoa ka bosholu ba lithunya tsa sepolesa.
Nyeoe e mametsoe ke ‘maseterata Lebusa Tšosane ha mochochisi oa eona e le mofumahali Motiki. Lengolo la qoso, le hlalosa ha ka la 28 Phupu 2023 pela motebo oa sepolesa liofising tsa Mabote seterekeng sa Berea, baqosuoa ka bobeli ebile e le ka mohopolo o tšoanang, ka thoko ho molao le ka maikemisetso ba ile ba ikhapela thepa ea motebo oa sepolesa e leng merathatha ea lithunya e ‘meli ea moetso oa AK-47 ‘moho le likulo tse mashome a tšeletseng.
Linomoro tsa lithunya ke 4A 2182 le K 8048. Baqosuoa ba kopile beile ‘me mofapa-hlooho oa se be le khanyetso. Kahona lekhotla le ile la laela moqosuoa ka mong ho itefella beile ea M3000 esita le ho laela ho beha M10 000 paneng moqosuoa ka mong. Ho sa le joalo, ba tlalehoa ba hlotsoe ho itefella chelete ea beile e M3 000 hammoho le M10 000 e behoang paneng ‘me ba leba chankaneng.
