LIMKOKWING E TŠOARA LIPONTŠO TSA FESHENE
La 12 Phuptjane 2023
Limkokwing University of Creative Technology e ile ea tšoara lipontšo setšeng sa mabekenkele Pioneer Mall, Maseru ka Moqebelo oa la 10 Phuptjane 2023 tlas’a mohoo oa Timeless Design Fashion and Exhibition. Sepheo sa lipontšo e ne e le ho bontša sechaba mesebetsi ea matsoho le boqapi ba baithuti ba lefapha la Fashion & Apparel Design hammoho le ba Creative Advertising and Graphic Design.
Baithuti ba banana le bahlankana ba ile ba tebuka ho pepesa liphahlo tsa street wear, office wear, lingerie, cocktail, red carpet le tse ling.
Leihlo la Basotho le qoqile le morupelli e bile e le hlooho ea lekala la Fashion, Limkokwing University of Creative Technology, mofumahali ‘Makamohelo Liname.
“Tsatsi lena ke le leholo moo re pepesang mosebetsi oa baithuti ho batho ba bangata. Sepheo ke ho keteka litsebo tsa bona ka kakaretso. Ke lipontšo tsa feshene tsa baithuti ba Diploma in Fashion & Apparel Design hammoho le ba mokhahlelo oa Honours. Re boetse re na le lipontšo tsa baithuti ba Creative Advertising and Graphic Design. Ntlha e ka sehloohong lipontšong tsena ke ho pepesa liphahlo ho bontša tema le litsebo tsa baithuti ho tloha ba qalile selemong sa pele hoba hajoale ba selemong sa boraro sa lithuto.
“Ka lefapheng la Creative Advertising and Graphic Design re qollotse mesebetsi e meng kahara e mengata e le ho bontša sechaba mosebetsi oa baithuti bana.
“Ntlheng ea ho ba thusa ho iqalla likhoebo tsa boiphiliso, ha ba qetile sekolong, re na le lefapha le bitsoang LIP le thusang baithuti ka tataiso ea ho iqalla likhoebo.” Mofumahali Liname o rialo.
O boetse a hlakisa hore ha baithuti ba qetile sekolong, e le junifesithi ba na le sesiu se bontšang hore baithuti ba ntse ba etsang bophelong ha ba se ba le kantle. Ntlheng ena o ile a teha mohlala a supa hore e mong oa baahloli lipontšong tseo, ke moithuti oa bona oa mehleng. A re eo o iphihletse haholo hoba ebile o na le khoebo.
Boha slide show sa litšoantšo tsa lipontšo tsa liphahla ka tlaase:
“Baithuti ba rona ha re na bothata ka bona ha ba phethetse lithuto; ba iphilisa ‘me ba bang ba fumana mosebetsi bo-Afrika Boroa koana.” Liname o bua a le motlotlo.
O ile a phethela ka leboha bookameli ba Pioneer Mall ka ho ba fa sebaka sa lipontšo; “Ke rata hape ho leboha Jam Session Sounds ka ho re thusa ka thepa ea sebuela-hole le molumo. Hape re ne re tšehelitsoe ke Touch of Style, Advanced Creatives, Mlex Beauty Spa, Capital Flooring, Morris, TWG le ntate Thabo Makhetha.” Liname o fera litaba tsa hae.
Ho sa le joalo, har’a bamemuoa ho bile teng mofumahali Makhukhumala Kama, mookameli oa lekhotla le sireletsang boqapi ka kakaretso – Lesotho Copyright Society of Authors and Artists – LESCOSAA.
Kama o ile a re bohle ba phuthehileng moo ba bone thepa e ntle e entsoeng ke baithuti ka boqapi ba bona. “Re motlotlo ho bona hore junifesithi ea Limkokwing e hlahisa litalenta le bokhoni ho baithuti.” Ke eena a simolla puo.
O ile a hlalosa hore LESCOSSA ke mokhatlo o thehiloeng ka molao oa Copyright Order oa 1989 e leng molao o sireletsang bataki, libini, bangoli, liqapi, architects, sculptures, bo-ralifilimi, le boqapi ka mefuta eohle hore mesebetsi ea batho e se kopitsoe le ho sebelisoa ka thoko ho molao.
“Sepheo sa LESCOSAA ke ho thusa baqapi ho sireletsa mesebetsi ea bona ka mekhahlelo eohle. Re sebetsana le mekhahlelo e mene; oa pele ke ho thusa bahlahisi bohle litaba-tabelong tsa mesebetsi ea bona ea boqapi, joaloka bonono, le ba bang.
Makhukhumala Kama, Mookameli oa LESCOSSA
“Mosebetsi oa bobeli ke ho ngolisa mesebetsi ea boqapi le batho ba e entseng. Oa boraro ke hore LESCOSSA e fana ka lilakesense ho basebelisi litabeng tsa khoebo.” Ho rialo Kama.
O bontšitse ba kene ka matla ho ngolisa libini le ho fana ka lilakesense ho tsona. O re haufi libini li tla fumana meropotso ha ‘mino oa tsona o bapaloa likhoebong, libeseng, le libakeng tse ling tsa khoebo.
“Mosebetsi oa rona oa ho qetela ke ho aba lichelete tse tla bokelloa ho beng ba mosebetsi ‘me ke eletsa baithuti hore le bona ba ngolise mesebetsi ea bona.” O kobella lintlha tsa hae Kama.
mofumahali Mojabeng Senegal-Ndebele
Ka lehlakoreng le leng ‘mabotle oa mehleng oa National University of Lesotho, mofumahali Mojabeng Senegal-Ndebele eo hajoale a sebetsanang le bophelo ba kelello ea batho, o ile a ipiletsa ho baithuti hore ba tšoarane ka matsoho ba sebetse ‘moho. A re ho sebetsa ka bonngoe ha ho thusi kaha lefu la noha ke ho tsamaea e le ‘ngoe. A bontša baithuti hore o fihletse tse ngata ka ho sebetsa ‘moho le batho ba bang.
