LIKOETA LI HAPA SENYETHE MALAENENG
Ka moqolotsi oa rona
Naha e tsoela-pele ho ja boea kaha mosali oa Ha Foso, Berea a ile a hlaseloa ke linokoane tse peli maobane mantsiboea.
Ho ea ka ba boneng ka mahlo, mosali o ne a setse a le mong malaeneng. Ke moo a ileng a tsoa a leba ntloaneng a siile lesea la hae ka tlung. Nakong eo a khutlang, ke moo a ileng a fumana ho se ho na le banna ba babeli bao a sa ba tsebeng, ba peralletse ka tlung; e mong a nkile lesea a ntse a le bapalisa.
“Ba ile ba fasa mosali sekolokoto; maoto le matsoho ebile ba mo koetse molomo.” Ho rialo moahi e mong a bua le Leihlo la Basotho.
Lehlatsipa le ile la tlalehela ba ileng ba fihla sebakeng sa ketsahalo hore likoeta li kene ka tlung kamor’a hora ea bohlano mantsiboea. Li ile tsa atleha ho ikhapela chelete e kaalo ka M3200 e neng e le ka tlung eaba ba ipha limenyane li siea li fasitse mosali.
Ho sa le joalo, bahaisane malaeneng ba ile ba atleha ho thusa lihlatsipa ka shoalane ‘me hoa hlajoa mokhosi sechaba sa phalla. Mahokela le bahlanka ba tšireletso ba ile ba fihla le bona. Hofihlela hajoale bakhosheli bao ha ba e-s’o tšoaroe.
