LESHOLU LE LEFA KA HLOOHO, THUATHE
Ka moqolotsi oa rona
Leihlo la Basotho
Mohlankana ea lilemo li ka bang mashome a mabeli o felletsoe ke bophelo hoseng hoa kajeno Sehlabeng sa Thuathe, Berea kamora ho khakhatheloa lefu ke bahlankana ba bararo, ba neng ba mo kabaka ka mabetlela.
Ba boneng ketsahalo ena ka mahlo, ba bontša ha mofu a tlohile motseng oa Baruting, hona Thuathe, a ntse a ikhapela lithepa tsa batho ka bosholu. Eka ha a ne a sa fumane seo a ka se hapang ho motho, o ne a mo nyekenya ka thipa.
Ho utloahala a ile a fihla motseng oa Lekhalong hona Sehlabeng sa Thuathe a ntse a etsa oona mosebetsi ona oa bokoeta.
Ke moo bahlankana ba bararo ba ileng ba mo sala morao ba mo qhautsa, ba ineha eena. Eka ba ile ba mo khakhatha hofihlela a balehela jareteng ea lelapa le leng haufi le tsela.
Moahi e mong ea boneng ka mahlo oa hlalosa; “Ke utloile lerata eaba ha ke betsa mahlo, ke bone motho a ntse a khakhatheloa ka jareteng ea lelapa le leng.
“Ke ile ka utloa lentsoe la motho le re tsoahang ka jareteng ea motho ‘me ba ile ba hula mofu joaloka ntja ba mo beha keiting eaba ba tsoela-pele ho mo seremaka.”
“Oa tseba leha a se a shoele, moshanyana e mong o ile a khutlela moo eo a neng a rapaletse a mo rahaka ka lieta.”
Ba bang bao e leng mahlasipa a mofu ba li beha tjena; “Re ile ra kopana le bashanyana ba babeli ba ileng ba re secha eaba ha ba fumane seo ba ka se nkang, ke moo ba ileng ba re hlotha katiba ea rona ea seterakhele.”
Ho sa le joalo, mahokela a motse a ile a tlaleheloa ‘me a ile a fihla ho phutha setopo le sepolesa se ileng sa bitsoa.
Mofu ho utloahala ha habo e le Ha Ts’osane, Maseru.
