LEPEKOLA O QOSOA KA HO UTSOA M9.1 MILONE EA BATSETELI
La 16 Phupu 2023
Lepekola Nxongo (33) oa Matholeng, Mafeteng o hlahile lekhotleng la ‘maseterata oa Maseru a qosoa ka ho ikhapela ka bomenemene M9,108,685.86 milone ea k’hamphani ea Stanlib Lesotho.
Moqosuoa o ne a sebetsa k’hamphaning e boletsoeng. Mosebetsi oa hae e ne e le ho thaotha batseteli ho tsetela lichelete tsa bona Stanlib Lesotho. K’hamphani ena e ngolisitsoe le Banka e Kholo ea Lesotho ho boloka le ho tsamaisa matsete a batho.
Har’a batseteli bao Nxongo a ba thaothetseng Stanlib ke ba latelang: ‘Mamosieleng Theoane, St. Leornard Health Centre, St. Mary’s Pre-School, Lesotho Catholic Bishop’ Conference Health Department, Caritas Lesotho, ‘Mamalefane Amelia Maile le ‘Mangaka Nkheli.
Batseteli ba boletsoeng kaholimo ba nehelane ka litokomane tsohle tsa bona ekasitana le lipolokelo tsa banka ho moqosuoa ha ba bula matsete. Moqosuoa ke eena ea neng a ngollana le batseteli bana ekasitana le ho buisana le bona ka mangolo.
Lengolo la qoso le re ka makhetlo a 94, moqosuoa o ntšitse kakaretso ea M9,108,685.86 milone ea batseteli ba boletsoeng ka bolotsana. Bopaki kapel’a lekhotla bo re o ile a fana ka lipolokelo tsa banka tse ling ho ntša chelete sa mokana eka ke batseteli ba batlang chelete ho Stanlib.
Chelete eo a e ntšitseng ka bolotsana e kene ho lipolokelo tse latelang tseo a ileng a fana ka tsona: F&L Holdings Pty Ltd, e nang le lipolokelo Lesotho Postbank le FNB Lesotho, Countryside Stationery and Printing e nang le lipolokelo Lesotho Postbank le FNB Lesotho, Lepekola Phias Nxongo ‘me polekelo eo e butsoe Lesotho Postbank le FNB Lesotho, Eclipse Public Bar and Car Wash e nang le polokelo Lesotho Postbank, le ‘Mapalesa Motumi ea butseng polokelo Lesotho Postbank.
Moqosuoa o qosoa ka ho utsoa chelete ka bomenemene ‘me liqoso li re o tlotse temana ea 68 (91) e balelloa le ea 109 ea Molao oa Pokello ea Litlolo tsa Molao oa 2010. Qoso ea pele e re lipakeng tsa la 8 Hlakola 2023 le la 4 ‘Mesa 2023 a le Stanlib Lesotho, Maseru ka maikemisetso le ka thoko ho molao o ile a fana ka litokomane tsa lefoofo a re ‘Mamosieleng Theoane o hula chelete ea letsetse la hae Stanlib e kaalo ka M1,350,000.00 ‘me ka bolotsana a re chelete eo e tšoeloe polokelong ea F&L Holdings Pty Ltd, a ikhakantse.
Qoso ea bobeli e re lipakeng tsa la 17 Hlakola 2022 le 1 Hlakola 2023 o ile a fana ka litokomane tsa mafosisa a re Caritas Lesotho e ntša chelete ea letsete e kaalo ka M2,000,000.00 ‘me a nehelana ka litokonane tsa maiqapelo hore chelete e tšeloe polokelong ea Countryside Stationery and Printing polokelong ea Lesotho Postbank.
Qoso ea boraro e re lipakeng tsa Tlhakubele 2020 le la 7 ‘Mesa 2020 o ile a nehelana ka litokomane tsa leshano a re motseteli ‘Mangaka Nkheli o ntša chelete ea letsete e kaalo ka M13,000.00 ‘me a re chelete e joalo e tšeloe polokelong ea ‘Mapaseka Motumi e Lesotho Postbank.
Qosong ea bone, moqosuoa o ile a nehelana ka litokomane tsa mokoebe a re St. Learnard Health Centre e hula M811,000.00 lipakeng tsa ‘Mesa 2020 le la 5 Mphalane 2022. Chelete eo e ile ea lebisoa polokelong ea hae e butsoeng Lesotho Postbank.
Qoso ea bohlano; hore lipakeng tsa Phupu 2022 le Pulungoana 2022, o ile a nehelana ka litokomane tsa maiketsetso a re St. Mary’s Pre School e hula chelete ea letsete e kaalo ka M3,000. Eona o ile a re e kene polokelong ea St. Leonard Health Centre a boela a re chelete e kaalo ka M150,000.00 e tšeloe polokelong ea Eclipse Public Bar and Car Wash e Lesotho Postbank.
Qosong ea botšelela o qosoa ka hore lipakeng tsa la 17 Motšeanong 2020 le Mphalane 2022 o ile a fana ka litokomane tsa mafosisa a re chelete ea Lesotho Bishops Conference Health Department e kaalo ka M1,075,164.86 e tšeloe polokelong ea hae e Lesotho Postbank
O boetse qosong ea bosupa a khelosa chelete ka bolotsana ea motseteli ‘Mamalefane Maile e kaalo ka M1,409,300.00 ka masene a phokojoe a re Stanlib Lesotho e tšele chelete eo polokelong ea F&L Holdings. Tsena li tlalehoa li etsahetse lipakeng tsa la 14 Phuptjane 2021 ho isa la 21 Phuptjane 2023.
Qoso ea borobeli e supa hore ka thoko ho molao le ka maikemisetso o hapile thepa ea chelete eo a e ntšitseng Lesotho Postbank e kaalo ka 4,224,201.00 empa a tseba hantle hore ha se ea hae. Ho feta mona, qosong ea borobong o qosoa ka ho ntša M4,884,484.86 FNB Lesotho feela a tseba hantle hore chelete eo ha se ea hae ke ea batseteli.
Ho sa le joalo, moqosuoa o lokollotsoe ka beile ea M50 000 ekasitana le ho beha paneng M100 000. O tla boela a hlaha khotla ka la 25 Phupu. Har’a lipehelo tsa beile ke hore a se kena-kenane le lipatlisiso ekasitana le lipaki tsa mofapa-hlooho a be a itlalehe lirimanteng khotla nako eohle ha a hlokoa.
