LEKHOTLA LE TJEBELA KOPO EA QAMO MATJOING
Ka Moipone Makhemeng
La 16 Phato 2023
Moqosuoa Qamo Matela oa Ha Mabote Berea, ea qosoang ka polao ea mofumahali oa hae ’Mahlompho Matela ea ileng a timela ka la 11 Mphalane 2021, o hlahile Lekhotleng le Phahameng kajeno ho mamela qeto ea lekhotla holim’a kopo ea hae moo a neng a re lekhotla le lahle bopaki ba hae.
Matela o ile a hlahlela kopo, ka tsela ea nyeoe kahara nyeoe hore bopaki ba maipolelo boo a ileng a bo etsa ho Inspector Moeketsi Moeketsi oa sepolesa sa Ha Mabote, bo se amoheloe ke lekhotla. O re lebaka la mantlha ke hore o fane ka maipolelo ao a tlas’a qobello ea sepolesa ebile a le tlas’a litšoso.
Matela o re tseo a neng a li bue maipolelong ao ke mafosisa le maiqapelo a neng a reretsoe ho mo qobisa ho hlokofatsoa ke sepolesa.
Bopaking bona, Matela o ne a bolelle Insp. Moeketsi hore o ne a le mothamahaneng bosiu ka la 1 Mphalane 2021, eaba o kopa mosali oa hae hore a ntše senotlolo sa hae monyako hoba eena o tla fihla bosiu a tsebe ho bula ka sa hae.
Maipolelong ao, Matela o re ‘Mahlompho ha a ka araba melaetsa ea hae ea WhatsApp ha a mo kopa ho ntša senotlolo. O re o bile a leka ho mo letsetsa empa mofumahali h’a ka araba ha e se ho koala mohala ha o lla.
O re ha a fihla lapeng o ile a hlasela mohatsa ba le ka kamoreng ea bona ea boroko. O re o ile a mo teteka ka litebele kaha eo a sa araba melaetsa ea hae ha a bua le eena ka WhatsApp ekasitana leha a mo letsetsa.
Polelong moo, moqosuoa o ne a hlalose ha a ile a kopa tšoarelo ho mofumahali oa hae ‘me a mo tšoarela. Leha ho le joalo, a bontša hore mohatsa o ile a ruruha marama; a khathatsoa ke lefu la ho akheha. Moqosuoa maipolelong o hlalosa ba ile ba ea sepetlele Willie’s, Khubetsoana hoa hlahlobuoa lintho tsa bohlokoa e leng ho phalla hoa mali, tsoekere le tse ling empa tsohle li ne li lokile.
Ho sa le joalo qeto ea Moahloli Tšeliso Mokoko ebile ho tjebela matjoing kopo ea Matela ea hore maipolelo a tjebeloe matjoing ke lekhotla. Mokoko o boleletse moqosuoa hore tlaleho ea maipolelo a ngotsoeng ke Inspector Moeketsi a litaba tse phetiloeng ke moqosuoa sepoleseng e tla sebelisoa ke lekhotla e le karolo ea bopaki khahlanong le moqosuoa.
Mokoko o lihile kahlolo a tsitlalla hore lekhotla le kholisehile hore Matela o fane ka polelo eo a se tlasa khatello ea sepolesa kapa litšoso life kapa life.
Nyeoe e se tla tsoelapele ka la 23 Mphalane 2023.
