LEKHOTLA LE LIHA KAHLOLO NYEOENG EA FOKOTHI
Ka Moipone Makhemeng
La 23 Phupu 2023
Lekhotla le Phahameng maoba le lihile kahlolo nyeoeng eo baithuti ba Lerotholi Polytechnic ba e ritetseng ba tseka ho fumantšoa lihlapiso tsa bona tsa khoeli le khoeli ho hlaha National Manpower Development Secretariet (NMDS). Lebaka ke hore ba fetetse khoeling e hlahlamang e tlolang nako e lumellanoeng konterakeng. Sena se bakiloe ke hore sekolo se ile sa eketsa alemanaka.
Ho feta mona, baithuti ba tseka hore ho behoe letsatsi la la 31 Phupu 2023 e le la lihlahlobo tsa mapomelo. Thapeli e ‘ngoe ke hore lihlahlobo tse ileng tsa ngoloa ke sehlotšoana sa baithuti li hlakoloe kaha boholo ba baithuti ba sa ngola. Leha ho le joalo baithuti ba khutlile lekhotleng ba hoshola; likola li le ka mahlong ka Labohlano.
Moahloli Fumane Khabo
Moahloli Fumane Khabo ha a kena holim’a kahlolo, o li behile ka mokhoa o latelang; “Ho ‘na ho bonahala eka kamano pakeng tsa NMDS le baithuti ke ea konteraka. Ke bapisa nyeoe ea Sibanyane le ba bang khahlanong le University of Fort Hare. Qeto ea lekhotla la Afrika Boroa nyeoeng eo e totobatsa hore konteraka e laoloa ke melao ea konteraka joalokaha e tsejoa.
“Kahona lekhotla le kena feela ho toloka konteraka ea NMDS le baithuti ekasitana le ho thusa ho phethahatsa lipehelo tsa eona. Baithuti ba kopa lekhotla ho laela NMDS ho ba lefa litsiane ho feta seo ba se tekenetseng likonterakeng tsa bona. Ntlha ena e tsamaellana le molao oa motheo, re tla lemoha hore ho kena ho eona ho tla tšoana le ho fetola lipehelo tsa konteraka; e leng phoso.
Kopo ea ho fana ka taelo nyeoeng ea mofuta ona, e hlalositsoe nyeoeng ea lekhotla la baithuti ba National Health Training Centre moo le neng le qosa boto e tsamaisang sekolo seo. Mona lekhotla le ile la supa lintlha tse latelang; tsela ea taelo ke tokiso ka boeona e seng tokelo, joalokaha e fanoe ka khetho ea lekhotla. Hore sena se atlehe ka tsela ea taelo, ho tlameha ho be le tokelo e arotsoeng ka molao ea mokopi ‘me ho entsoe tlhahlobo kapa ho sekisetsa tokelo ena.” Moahloli o bala kahlolo.
Khabo o re lekhotla le fumane NMDS e phethile boitlamo ba eona hobane e phethahalitse seo baithuti ba se tekenetseng likonterakeng.
O hlalositse hape hore ha ho ea ka hanang hore Lerotholi Polytechnic e nkile qeto e fosahetseng ho atolosa alemanaka ea eona ntle le ho rerisa NMDS ka nako. Leha ho le joalo, a bontša NMDS e tsebisitsoe ka alemanaka e ncha ho tloha ka Tlhakubele 2023.
O boetse a makalla NMDS ka ho se fane ka karabo. O itse hoja baithuti ba ile ba ngola lihlahlobo, litaba li ka be li se mothating ona. “Baithuti ba bone monyetla oa ho fumana chelete ea khoeli leha ba ne ba tla ba sekolong beke feela.
“Lekhotla lena le tlameha ho aba toka le shebile mahlakore ‘ohle ebile le etse hloko litla-morao tsa sena.” O hlalosa joalo.
Moahloli o hatelletse ntlha ea hore mosebetsi oa lekhotla ke ho etsa bonnete ba tšebetso ea boitlamo ba likonteraka e seng ho theha lipehelo tsa lona tse ncha.
Ha a liha kahlolo, Khabo o amohetse thapeli ea hore sekolo se buloe bana ba ngole lihlahlobo empa a lahlela matjoing lithapeli tse ling e leng tse akhang hore lekhotla le laele NMDS ho fa baithuti lihlapiso empa selemo se felile ho ea ka konteraka.
“Qeto ea sekolo ho chechisa lihlahlobo ka nako e sa boleloang e behelloa ka thoko le ho lokisoa empa likopo tse ling li lahleloa matjoing kaofela.
“Ha ho taelo mabapi le tefo ea litšenyehelo tsa nyeoe ho balli.” Khabo o rialo a fera kahlolo.
Ha litaba li le tjena, Khabo o khothalelitse mahlakore a amehang ho khutlela tafoleng ea lipuisano e le ho fihlela tharollo e tla thusa baithuti ho ngola lihlahlobo.
