LECHAENA LE QHEKANYETSA RSL M1 MILONE
Ka Moipone Makhemeng
La 11 Phato 2023
Letsoalloa la China le hoebang Lesotho, Chen Jingson oa k’hamphani ea DK Enterprises Pty Ltd e fumanehang seterekeng sa Berea, o hlahile lekhotleng la ‘maseterata Maseru maoba a qosoa ka ho qhekella Setsi sa Pokello ea Lekhetho (Revenue Services Lesotho – RSL) chelete e balloang ho M1,084 974.59
Nyeoe e bile kapele ho ‘Maseterata Nthabiseng Moopisa ha mochochisi e bile Adv. Lehlanako Mofilikoane. Ho ea ka lengolo qoso, moqosuoa ho tloha ka Pulungoana 2021 hofihlela hajoale ha a tšoaroa, esale a nehelana ka litokomane (invoices) tsa lefofo ho RSL hape a sa lefelle thepa lekhetho ha e kena lelibohong la Maseru.
“RSL e ile ea lumella thepa ea moqosuoa ho feta lelibohong la Maseru ka lebaka la tlhahiso-leseling e senotsoeng le leng kahar’a litokomane tseo le phatlalatso (declaration) ntle le hore ho lefuoe lekhetho le nepahetseng la thepa ha e kena kahara naha.
“RSL e ile ea amohuoa tokelo le monyetla oa ho bokella chelete e bontšitsoeng lenaneng la 7 e le lekhetho la boleng ba thepa e tsoang kantle ho naha le neng le lokela ho tsoa ka nako.”
“Hoja moqosuoa o ile a fana ka litokomane tsa ‘nete, tse nepahetseng, RSL e ka be e khonne ho bokella lekhetho le ekelitsoeng la boleng ba kantle ho naha joalokaha ho bontšitsoe lenaneng la pele le kenyellelitsoeng molatong oa kakaretso ea M1,084 974.59 e neng e lokela ho lefelloa thepa e neng e kenngoa ka hare ho naha ke moqosuoa.” Lengolo la qoso le hlalosa joalo.
Moqosuoa kamora ho balloa qoso o ipoletse ha a se molato. O re oa etselletsoa empa Maseterata Moopisa o ile a mo bolella hore oa tseba oa etselletsoa hofihlela a netefallelitse lekhotla hore oa etselletsoa. Ho feta mona, moqosuoa o lefile beile ea likete tse leshome ‘me o tla emela letsatsi la nyeoe a le ha hae.
