KOEKOELE O QOSOA KA HO TLEPETSA MOKHETHOA KA MAJOE
Ka Moipone Makhemeng
La 18 Loetse 2023
Monna oa Mosotho, Koekoele Koekoele (49) oa Matšela-Habeli Ha Morena Seeiso Bereng Seeiso, Semonkong o hlahile lekhotleng la ‘maseterata oa Maseru kapele ho ‘masetereta Peter Murenzi a qosoa ka ho hlasela ngoanabo, Mokhethoa Koekoele. Moqosuoa o hlahile lekhotleng ka la 15 Loetse 2023.
Lengolo la qoso le hlalosa ha ka la 31 Mphalane 2022 haufi kapa Matšela-Habeli, Semonkong moqosuoa ka maikemisetso le ka morero a ile a tlepetsa ka majoe le ho khakhatha Mokhethoa Koekoele ka molamu hloohong le hohle ‘meleng ka maikemisetso a ho mo hlahisa likotsi tse mpe kapa ho mo holofatsa le ho mo bakela bokooa.
Mochochisi oa nyeoe ke R. Khaile ha ‘muelli oa moqosuoa e le Adv. Pitso ea ileng a kopela moqosuoa beile e sa kang ea hanyetsoa ho hang ke mochochisi. ‘Matli oa nyeoe ke Police Constable Sakoane oa motebo oa sepolesa, Semonkong.
Lekhotla le ile la lokolla moqosuoa ka beile ea M1000 eo a atlehileng ho itefella eona. O ile a laeloa ho lula a tsamaea lirimante hofihlela letsatsi la nyeoe le behaoa.
Ho feta mona, ‘maseterata o mo laetse ho se kena-kenane le lipaki tsa mofapa-hlooho hammoho le lehlatsipa nyeoeng ena.
