HO NA LE BATHO BA NTSENG BA PHELA KA MOKOTING
… LETONA MANTASHE O BELAELA JOALO
La 26 Phuptjane 2023
Kajeno letona la Lirafshoa le Matla Afrika Boroa, monghali Gwede Mantashe o etetse morafo o koetsoeng oa Shaft No. 5, Virginia, Harmony, Welkom. Ketelo e latela tsietsi ea ho shoa hoa makhomosha a Lesotho a 31 ao litopo tsa ‘ona esale li tšoaseha mpeng ea lefatše.
Koluoa e ne e tlalehoe ke ‘muso oa Lesotho e etsahetse ka la 18 Motšeanong 2023. Sesosa sa lefu ebile ho hema khase ea mokoti (methane gas). Mona ho ile hoa pholoha monna a le mong feela. Morafo o tlalehoa o ne o koaloe lilemong tsa bo-1990.
Moqolotsi oa litaba oa SABC o bile moo empa o itse ba teng moo e le baqolotsi feela ba boleletsoe hore ha ba lokela ho ba moo ho latela kotsi ea khase e ntseng e nyoloha tlaase mokoting.
Oa hlalosa a bua thelefishining ea SABC: “Ha u sheba mane moo ho koetsoeng ho thoe batho ba se ke ba atamela, u tla bona hore khase e ntse e foqoha teng. Sebaka sena se hlalosoa se le kotsi haholo. Mohlomphehi letona (Mantashe) o tlile mona ho tla hlahloba maemo.” Ke eena thelefishining.
Ho sa le joalo, raliphatlalatso oa sepolesa sa Foreistata ea bileng moo, Brigadier Motantsi Makhele o itse: “Hajoale ho ntšitsoe litopo tse tharo feela tseo barafi bao ba ka thoko ho molao ba nehelaneng ka tsona ho sepolesa.
Brigadier Motantsi Makhele [SABC].
“Batho ba tla lemoha hore rona re le sepolesa re ke ke ra etsa qeto ea ho kena mokoting mono re le bang. Hona joale re itšetlehile ka leseli leo re le fuoeng ke bona banna bano ba li-zama-zama. Ke hona re ntseng re hlahloba boemo feela ke rata ho hlakisa hore ho kotsi ho kena ka mokoting ka moo hajoale kaha khase e maemong a holimo haholo hajoale.” O fera joalo.
Ho sa le joalo, Letona Mantashe o fane ka tšepo ho malapa a amehile a re ho na le khonahalo ea hore ho na le makhomosha a ntseng a phela mpeng ea lefatše: “Ho na le motsamao oo re o utloileng ka mpeng ea lefatše, ho na le motsamao ‘me re belaela hore ho na le batho ba ntseng ba phela ka mono ba tšoasehile. Haeba pelaelo ea rona e le ‘nete ho na le ba ntseng ba phela, haeba khase ea mokoti e ka phatloha hape, ho tla ba le mafu a mang hape.” Ke Mantashe a bolella baqolotsi ba litaba a le morafong moo.
Mamela puo ea Mantashe ka tlaase:
Ho sa le joalo sebuelli, sa morafo, Sihle Maake o itse letšolo la pholoso le ke ke la tsoela-pele. “Maemo a khase ea mokoti a ntse a le holimo haholo, kahona ha ho motho eo re tla mo lumella ho kena moo mokoting. Ho kotsi ho rona ho romela sehlopha sa pholoso ka mono. Ke ka hona re ntseng re sebetsa ‘moho le Lefapha la Merafo ho fumana matsapa a mang a bolokehileng ho fumana hore na re ka etsa joang ho ntša litopo ka mokoting.” Maake oa hlalosa.
