HO BULOA MOTEBO OA SEPOLESA PIONEER MALL
Ka moqolotsi oa rona
Setša sa mabenkele se seholo sa Pioneer Mall, Maseru se butsoe ka 2009 empa ho se motebo oa sepolesa joaloka litša tse ncha tsa mabenkele e leng Maseru Mall le Masianokeng Lifestyle Centre tse ileng tse abeloa metebo ea sepolesa hang ha li qala tšebetso.
Kajeno bookameli ba sepolesa le beng ba Pioneer Mall, Moruo Development, ba butse motebo-ntloana oa sepolesa setšeng sena sa mabenkele.
Holomo Molibeli, Mookameli oa Sepolesa
Lebitsong la Moruo Development, monghali Mohlomi Rantepa o ile a leboha bookameli ba sepolesa ka ho amohela kopo ea bona hore ho hlongoe motebo oa sepolesa sebakeng sena ka sepheo sa ho tla loantša litlolo tsa molao tse etsahalang moo.
“Kamora hore setho sa tšireletso se bolaoe mona, mookameli oa sepolesa o ile a re ho hlokahala hore ho hlongoe motebo oa sepolesa setšeng sena.” Rantepa o li behile joalo.
Litho tsa Boto ea Moruo Development
Ho sa le joalo, mookameli oa sepolesa, Holomo Molibeli, o ile a beha puo ea hae ea pulo ea semmuso ea motebo: “Motebo ona o tlil’o thusa sepolesa ho ntšetsa-pele tšebetso ea ‘ona ea tšireletso. Re tlo polesa sechaba se tlang mona setšeng sena sa mabenkele.
“Khoebo e hloka tšireletso ho hola, ha khoebo e sa kholiseha hore polokelo le tšireletso li teng e ke ke ea hola. Re ile ra ba le bomali-mabe mona moo mohlanka oa setsi sa tšireletso a ileng a hlaseloa a bolaoa. Taba ena e re butse mahlo hore re akofise taba ea tšireletso litšeng tsa khoebo.
Liofisiri tse kholo tsa sepolesa
“Re lokela ho inahanela hore na sechaba se tlileng mona se sireletsehile hakae, haeba u siea koloi ea hau na ha ho na fumana ba nkile radio kapa battery ea koloi ea hau.
“Mosebetsi oa rona o mong mona ke taolo ea sephethephethe ‘me taba e re lubang haholo ke ea likoloi tse laeshela baeti ka tseleng mane empaPioneer Mall e li ahetse setopo joale ke bane ba laella batho ka tseleng.
“Re itlama hore re tla eketsa mapolesa a sebetsang mona ‘me hona kahare ka mane ho lokela ho be le tafole ea lepolesa ho fana ka thuso eo motho a ka e hlokang.” Monghali Molibeli o phethela joalo.
