HANTŠI O HLAHLELA NYEOE KAMORA HO LELEKOA
La 15 Phato 2023
Ka moqolotsi oa rona
Mookameli oa Likhetho Komising e Ikemetseng ea Likhetho (Independent Electoral Commission – IEC), monghali Mpaiphele Maqutu o lelekile Mookameli oa Liphatlalatso oa Komisi, Tuoe Hantši ka la 11 Phato 2023.
Teleko ea Hantši e tla kamora ho qosoa ke Maqutu a lla ka hore Hantši oa tella kaha a hanne ha a mo biletsa ofising ea hae pejana ka la 29 Motšeanong 2023.
Ka la 29 Motšeanong 2023, Maqutu o ile a ngolla Hantši lengolo leo a neng a re a hlalose mabaka ao a ke keng a nkeloa likhato tsa khalemo ka lebaka la boitšoaro ba hae:
“Ke kopa u bontše mabaka ao likhato tsa khalemo li ke keng tsa nkoa khahlanong le uena ka lebaka la seo ke nkang e le ho nyelisa litaelo tsa ka ka mabaka a latelang:
Mpaiphele Maqutu, Mookameli oa Likhetho (IEC)
“Kajeno ka la 29 Motšeanong 2023 ka bo-hora ea borobong hoseng, ke ile ka kopa Mongoli oa Phethahatso oa Mookameli oa Likhetho ho u tsebisa hore ke lakatsa hore u itlalehe ofising ea ka hammoho le mohlanka oa nakoana ea sebetsang ofising ea hau ea liphatlalatso.
Mongoli o ile a mpolella hore u itse uena o tla sitoa ho tla ofising ea ka ka le reng ke ka makhetlo u ntjoetsa hore ke se ke ‘ne ka u bitsetsa ofising ea ka hammoho le mohlanka ea ka tlaase ho uena. Ke kopa u fane ka mabaka ka mongolo ao u ke keng oa nkeloa likhato tsa khalemo pele nako ea chaile hosane ka la 30 Motšeanong 2023.” Lengolo la Maqutu ho Hantši le baleha ka tsela eo.
Ho sa le joalo, Hantši o ile a arabela lengolo a re: “Kajeno hoseng, Mongoli oa Phethahatso o ile a mpolella hore Mookameli oa Likhetho o batla ho mpona hammoho le mosebetsi oa nakoana ofising ea heso ea liphatlalatso.
“Ke ile ka mo hlokomelisa hore ke buile le Mookameli oa Likhetho ka taba ena ea ho bua le mohlanka ea ka tlaase ho ‘na ke mo bontša ho se khotsofale hoa ka tabeng ea ha a bua le mohlanka eo ka katloloho a sa bue le ‘na ke le hlooho ea lefapha la liphatlalatso. Leha ho le joalo, mookameli o ile a tsitlalla hore o tla tsoela-pele ka mokhoa oo oa tšebetso ‘me taba eo re ile ra e feta.
“Mongoli o ile a re o tla khutlela ho ‘na hamorao kaha mookameli a ne a se a phathahane le Mookameli oa Lefapha la IT. O ile a fela a khutlela ofising ea heso ka mohala empa a bua le mohlanka eane eo ke mo okametseng kaha ‘na ke ne ke na le moeti ea tsoang ka ntle. Ke ile ka mo bolella hore ke sa ntsane ke na le moeti ofising ea heso.” Ke karabo ea Hantši.
Hantši lengolong o re kaha o ne a na le moeti, o ile a romella mohlanka eo ea ka tlaase ho eena hore mookameli a se eme nako e telele ha eena a ntse a buisana le moeti ho hlaha mokheng oa lipolotiki oa AUM ea neng a tlile ka litaba tsa lipatala tsa baemeli ba mokha oo tse sa pataloang ka nako.
“Nke ke ka hana ha mookameli a mpitsa ka mabaka afe kapa afe ‘me ha kea hana ha ke bitsoa hoseng hona. Ha ho le ka mohla nka hanang litaelo tsa mookameli.” Ke Hantši lengolong.
O bile a ikopela tšoarelo ha sekete ka hore o ile a sitoa ho fihla ofising ha a bitsoa. “Ke kopa tšoarelo ha sekete Ntate ka ho sitoa ho tla ofising ea hau ha u mpitsa.” Ke eena a supa hore kaha o ile a romella mohlanka ho mo emela, o ne a sa nahane hore taba eo e ka ba le bothata kaha mohlanka o ile a fana ka tlaleho ea tse tšohliloeng kopanong le mookameli.
Leha ho le joalo, Maqutu o ile a ngolla Hantši lengolo a mo tsebisa hore mabaka ao a faneng ka ‘ona ha utloahale ebile ha a mo khotsofatsa ‘me tulo ea khalemo e tsoela-pele.
Liqoso tulong ea khalemo e bile hore Hantši o telletse bookameli ka ho hana ho ikobela litaelo tsa mookameli ha a ne a mo biletsa ofising ea hae ka la 29 Motšeanong 2023.
Pele ho tulo, Hantši o ile a ile a mathela Lekhotleng la Bosebetsi a batla ho emeloa ke moemeli oa molao tulong e joalo ‘me lekhotla la fana ka taelo ea hore a emeloe ke akhente.
Tulo e ile ea ba ka la 28 Phuptjane 2023 le la 11 Phato 2023 bosieong ba ‘muelli oa molao oa Hantši. Molula-Setulo e bile monghali Hlalele Tšolo.
Ho sa le joalo, mookameli oa likhetho kamora tulo ea la 11 Phato 2023, o ile a fa Hantši lengolo la teleko.
“Kamora tulo ea khalemo ka la 28 Phuptjane 2023 le la 11 Phato 2023 moo uena le moemeli oa hau le ikhethetseng ho se tsoele-pele, molula-setulo oa tulo ea khalemo o u fumane u le molato oa ho nyelisa bookameli ka ho hana litaelo tsa hae ‘me o entse khothaletso ea hore o lelekoe hang-hang.
“Komisi e lakatsa ho u tsebisa hore e amohetse qeto ea molula-setulo oa tulo ea khalemo e le joalo. Tseba hore u lelekuoe hang-hang. U koptjoa kahona ho nehelana ka thepa ea Komisi e matsohong a hau.” Le rialo lengolo la teleko la la 11 Phato 2023.
Ha litaba li le tjena, Hantši o boetse o hlahletse nyeoe Lekhotleng la Basebetsi o tseka hore tulo ea khalemo e qaloe qalong kaha e tšoeroe a se na boemeli ba molao ho ea ka taelo ea lekhotla e ileng ea lokolloa pejana ke lekhotla. O boetse o lla ka hore teleko ea hae e ka thoko ho molao.
