HA REA HIRA KA SEKHUKHU – LDF
Ka Moipone Makhemeng
La 22 Phato 2023
Koranta ea Leihlo la Basotho e fumane menyenyetsi ea hore ho na le karolo ea baroetsana ba fumaneng koetliso ea lerato la naha, ka boemo ba Boot Camp bao Sesole sa Lesotho (Lesotho Defence Force – LDF) se ba rometseng naheng ea India ho ea koetlisetsoa bosole teng.
Bao ha ba khutla koetlisong e-ba liofisiri tsa sesole. Ho boetse ho hlaha taba ea hore baroetsana ba hloauoe ke sesole ho se phatlalatso kapa khoelehetso e lebang sechabeng joaloka tloaelo.
Koranta e boetse ea etela ofisi ea Mookameli oa Liphatlalatso tsa Sesole, Lieutenant Colonel Sakeng Lekola ho fana ka lehlakore tabeng ena.
Bahlankana le Baroetsana ba Boot Camp moketeng oa tsoalo ea Motlotlehi
Lekola o itse Molaoli oa sesole a ka koala likheo ka tsela ea khoelehetso e lebang sechabeng kapa a ipapisa le molao oa naha le oa sesole hammoho le mokhoa oa tšebetso oa masole a machaba ho koala likheo ha li le teng ho se khoelehetso.
“Taba eo ke lakatsang ho e hlakisa ho Basotho ke hore ha re hanane le khoelehetso ea likheo tseo re batlang hore sechaba se li tsebe empa Molaoli le eena o na le matla a ho etsa mosebetsi oa ho koala likheo a ipapisitse le molao oa naha le oa sesole ho sa etsoa khoelehetso sechabeng. Ke lakatsa ho hlakisa hore sesoleng ha se moo re hlahisang mosebetsi.
“Ka ho se hoelehetse likheo tsena, LDF ha e ea tlola molao ’me kahona ha rea hira ka sekhukhu. Re latetse methati ea molao. Ha re hanane le hore phatlalatso e ka etsoa empa le ena ha e na phoso. Commander acted within the law, commander o na le matla a molao.” O rialo a hlakisa.
O teketse moifo oa koranta hore, “khetlong lena naha ea India e ntšitse likheo tseo e reng masole a Lesotho a lo koetlisetsoa boofisiri ba sesole. Ka ho khetholoha likheong tseo, naha ea India e hloka bo-‘m’e ba nang le mangolo a Degree, ba le lilemo tse 23 ho ea tlaase. Sesole sa Lesotho se qetetse ho hira ka 2019 ‘me hona ho bolela hore ha re na masole a lilemo tse kaalo.”
O otlolla hore ho bile le li-interview kamora hore sesole se hloaee batho ba itseng mafapheng a fapaneng a sechaba. Mona o re ho bile le ba ipabolang. Kamora seo ba boetse ba hlahlojoa ke lingaka hore ba phetse hantle.
O itse ho bile le mekhahlelo e fapaneng ea ba eang India; a re motho oa pele monongoaha o ile India qalong ea selemo ‘me e mong o mothating oa ho tsamaea. A totobatsa hore hang ha ba phethela koetliso eo ba fuoa rank ea Commissioned Officer, boemong ba Second Lieutenant kaha bona ba sa qale tlaase qalong.
“Taba ena ha e qale ho etsahala. Ho na le liofisiri ka sesoleng ka mona tse mekhahlelong ea sesole e holimo ’me ba fetile tlas’a mothati ona. Ha Molaoli a sebelisa mokhoa ona oa recruitment o atamela mafapha a amehang joaloka Lekala la Tšireletso le letona la tšireletso. Ha iketsetse liqeto a le mong o fuoa tlhohonolofatso ke ba baholo.” Ho rialo raliphatlalatso.
O hatetse pele hore LDF e boemong ba ‘transformation’ hape e le sesole se nang le boiphihlelo, ba ikamahanya le masole a mang a machaba.
“Re sebetsa ka moo linaha tse ling tsa machaba li sebetsang ka teng ntlheng ea ho batla batho ho koala likheo ka sesoleng ho ipapisitsoe le molao oa naha ea Lesotho hammoho le molao oa sesole (LDF Act No.4 of 1996). Re boetse re sebelisa melaoana e meng ea sesole; e leng li-regulations tsa LDF.
“Re na le metsoalle ea linaha tse fapaneng tseo re fapanyetsanang le tsona ka mokhoa oa likoetliso. Ka nako e ‘ngoe re isa batho linaheng tse joalo. Athe ka nako e ‘ngoe linaha tseo li romella barupeli ba tsona koano.” O itsatso.
O re mokhoa ona oa koetliso o litjeo li bobebe papisong leha ba ikoetlisetsa batho hore e be masole.
Ho feta mona o boetse a supa hore masoleng ho na le mekhahlelo e ‘meli; Commissioned Officers le Non-Commissioned officers. A re boemo ba Commissioned Officers ke liofisiri ho tloha ka boemo ba Second Lieutenant ho ea holimo. A hlalosa hore Non-Commissioned Officers ha se liofisiri ’me ba kena sesoleng ba qala boemong bo tlaase ba Private.
“Khoelehetso ea likheo tse tlatsoang ka sesoleng e etsoa, ho ipapisitsoe le molao oa LDF Act No.4 of 1996. Ka ho khetholoha ho ipapisoa le temana ea 12 tlas’a sehlooho se reng Command and Administration. Temaneng ena ea 12, subsection 2 e re: ‘It shall be the duty of the commander of the Defence Force to determine and implement such measures as he may consider necessary for, commanding and controlling the members and equipment of the Defence and using them to the best advantage. Mona re bua ka taolo le tsamaiso ea thepa ekasitana le litho tsa sesole molemong oa sechaba ka tsela e nepahetseng.
“We maintain proper discipline in the Defence Force. Mona re bua ka boitšoaro ba masole bo nepahetseng, ke mosebetsi oa bolaoli, hape C ea teng e re improving the organization in terms of method and procedures of the Defence Force ho bebofatsa mekhoa e mecha kapa litsamaiso ka ho fapana sesoleng.
“Karolo ea D temaneng ena e re ‘securing the most economic and efficient utilization of the resources provided for the maintenance of the Defence Force re sa senye haholo ka tsela e amohelehang. Molaoli o na le boemo ba ho etsa qeto hore na sesole se tsamaisoe joang ho kenyeletsa le likhoelehetso tsa ho tlatsa likheo ho ipapisitsoe le litaba tseo ke buileng ka tsona tse ‘ne.
“Mokhahlelong oa Commissioned Officers, tloaelo ke hore ba eang linaheng tse ling mokhoa oa ho kenya batho bana kahare ho sesole ba etsoa recruit ka ho latoa ka ntle koana ho tloha bophelong ba bosafilone.
Lieutenant General, Mojalefa Letsoela
Leha ho le joalo, ka linako tse ling ho ee ho khethoe ho ba se ntse ba le kahara sesole ‘me ba isoe boemong boo ba commissioned officers.
“Bao e seng liofisiri e le non-commissioned officers ba na le mokhoa oa khoelehetso ea ho kena koetlisong ea sesole e leng boemong bo tlaase ba private ho ea holimo, bona ha e-be liofisiri ka kotloloho.
“Ba tlohang bophelong ba bosafilone ba tla koetlisong ea ho ba Commissioned Officers ba bitsoa Officer Cadet, kaha ba feta tlas’a koetliso ea cadet, ho ipapisitsoe le melaoana ea LDF e buang ka Defence Force Regular cadet officers regulations ea 1998 e reng cadet officer means a person engaged for service as a cadet officer in the regular force.
“Mona re bua ka motho ea tlo kena thupelong a bitsoa le-cadet a tlo sebetsa kahara sesole e le-cadet. Taba tsena kaofela ha u li sheba li ea bontša hore Molaoli o na le matla a ho khetha hore batho ba joalo ba ka kena joang kahara sesole.” O menyeletsa joalo.
