DOTI O QOSOA KA BOQHEKANYETSI
Ka Moipone Makhemeng
La 30 Pulungoana 2023
Letona la mehleng la Ntšetso-Pele ea Sechaba, ‘Matebatso Doti (71) oa Lithabaneng, Maseru ha morena oa Sehlooho, Khoabane Theko, o hlahile lekhotleng la ‘Maseterata oa Maseru ka la 27 Pulungoana 2023 a qosoa ka boqhekanyetsi ba ho thetsa Setsi sa Taolo ea Mobu (Land Administration Authority – LAA).
Ho ea ka lengolo la qoso, Doti o hlalosoa lipakeng tsa la 1 Phato 2019 ho isa la 25 Loetse 2019 haufi kapa liofising tsa LAA a ile a bua leshano kapa ho patela LAA ‘nete eo a neng a lokela ho e hlahisa.
Ho thoe o ile a fana ka polelo e ngotsoeng tlas’a kano (affidavit) ea lefofo e neng e re mabitso a Mojabeng Monyau le ‘Mamotlatsi Monyau ke motho a le mong.
“Moqosuoa ea boletsoeng ka maikemisetso le ka thoko ho molao o ile a etsa tokomane ea lefofo (fake) ho LAA kapa a pata ‘nete eo boemong boo a neng a lokela ho e hlahisa. O entse sena ho roka LAA mahloana-a-naketsana.” Karolo ea qoso e baleha joalo.
Qoso e tsoela-pele hore sena o se entse e le ho etsa kopo ea ho fetolela lisi ea nomoro ea 13302- 786 ho tloha mabitsong a ‘Mamotlatsi Monyau ho tla ho eena. Kahona, ka ketso ea ho fa LAA litaba tsa leshano moqosuoa o entse tlolo ea molao kaha o bakile hore LAA e tlaile thifa.
Moqosuoa o fuoe beile ea mahala ea boikaloso ho ipapisitsoe le lilemo tsa hae tse holimo le hore oa kula. O tla hlaha hape khotla ka la 4 Tšitoe 2023.
