COLEPE E BATLA NYOLLO EA MEPUTSO
Ka moqolotsi oa rona
La 19 Loetse 2023
Setlamo sa mekhatlo ea basebetsi ba ‘muso, Coalition of Government Employees (COLEPE), se ngolletse letona la bosebetsi, khiro le bosebeletsi ba sechaba, Richard Ramoeletsi ho kopa kopano le eena pele ho la 29 Loetse 2023.
Sepheo ke ho tsosolosa lipuisano tsa nyollo ea meputso ea bahlanka ba ‘muso. Nako e fetileng COLEPE e ne e batla nyollo ea 25%.
“Re ipapisitse le boitlamo ba ‘muso oa Lesotho lengolong la oona la la 15 Ts’itoe 2022, re lakatsa ho hopotsa mohlomphehi hore nako e fihlile joale hore re qalelle lipuisano tsa rona le ‘muso hore meputso ea bahlanka e nyolloe. Re hlaha tjena ka khopotso ena hobane nako ea ho hlopha likhakanyo tsa lichelete tsa selemo sa lichelete sa 2024/2025 e qalile. Kahona, re kopa ho ba le kopano le uena ka litaba tsena pele ho la 29 Loetse 2023.” Ke karolo ea lengolo la COLEPE la la 15 Loetse 2023.
Setlamo sa COLEPE se bopiloe ka mekhatlo e latelang Lesotho Police Staff Association (LEPOSA), Lesotho Public Service Association (LEPSSA) Lesotho Association of Teachers (LAT), Lesotho Teachers Trade Union (LTTU) Qiloane Nursing Assistants Association (QINUASA) le Lesotho Nurses Association (LNA) se ngolletse tona-kholo lengolo.
Hang kamora hore tona-kholo Sam Matekane a nke puso ngoahola, mekhatlo ea basebetsi e ile ea kopa ’muso ho ekeletsa bahlanka meputso ka 25%, empa hoa se be joalo kaha ba ile ba nyolleloa ka linoko tsa 2.5%.
Karolo ea lengolo la mekhatlo e ne e baleha joana: “Nakong ena eo ’muso o lokisang likhakanyo tsa lichelete tsa 2022/2023 COLEPE e batla nyollo ea moputso ea bahlanka ba ’muso ka 25%.
“Lebaka la seo ke hobane maemo a moruo a bakile hore meputso ea bahlanka e hloke boleng, kaha theko ea lijo le thepa eohle e phahame ka tsela e ts’osang.
“Haeba ’muso o hloloa ho nyolla re batla hore bahlanka ba lefisoe khafa ho tloha ka mohlanka ea kholang M48 000 ka selemo e leng M4000 ka khoeli, hape sekhahla sa khafa se theoleloe ho 20% le 28%.
“U tla hlokomela hore phano e monyebe ea lits’ebeletso e bakoa ke meputso e fokolang ea bahlanka ba ‘muso.” Lengolo le baleha joalo
