BOPAKI BA NKHAHLE NYEOENG EA MASOLE A LESHOME
Ka Moipone Makhemeng
La 9 Mots’eanong 2023
Kajeno ho hlahile Police Constable (PC) Mohlominyane Nkhahle e le paki ea lepolesa nyeoeng e ntseng e tsoela-pele Lekhotleng le Phahameng, Maseru ka pele ho Moahloli Moroke Mokhesi moo ho qosoang masole a leshome ka polao ea banna ba bararo; Lekhoele Noko, Khothatso Mokebinyane le Molise Pakela ka la 16 Mots’eanong 2017, ka hore ba ba fenethetse Setibing Maseru ba nt’o akhela litopo tsa bona letamong la Mohale.
PC Nkhahle o hlaloselitse Lekhotla hore bafu e ne e le babelaelloa lefung la lesole le ileng la bolaoa borokhong ba Maseru ka 2017 ‘me ba ne ba bolokiloe setokiseng – Central Charge Office Maseru.
O hlalosa ha letsatsi leo ba neng ba lokela ho lokolloa ka lona ba ile ba kopa ho se lokolloe ba mpe ba emele baamani le bona kaha ba ile ba hlalosa bophelo ba bona bo ne bo le tlokotsing.
Ha a tsoela-pele a supa hore ka le hlahlamang motsoali oa Lekhoele o ile a fihla a tl’o lata mor’ae ha ba bang bona ba ile ba tsamaea letsatsi le hlahlamang leo.
O re Molise Pakela o ile a kopa ho siea kobo ea hae ka le reng o na le ts’abo ea hore bo-ntate (ba masole) ba neng ba ba hloma lipotso ba mo nkile linepe kahona ha ba ka kopana le eena ba tla mo tseba ha bobebe ka eona.
Ho sa le joalo, PC Nkhahle o bonts’a hore letsatsi le hlahlamang leo, ‘m’e oa Lekhoele o ile a fihla a tlisitse tlaleho e reng ha ba le Lekokoaneng ho na le koloi e ileng ea thibella bese eo ba neng ba e palame ba e emisa. O re tlhaloso ea ‘m’e eo ke hore banna ba ileng ba jethoha koloi ba ile ba its’ohlometsa kahare ho bese ba toba morao moo ba neng ba lutse le mora oa hae.
Ho ea ka tlhaloso, ‘m’e oa Lekhoele o hlalosa a ile a koaela mora ka mose ka khopolo ea hore bao ha ba sa ‘mone ba tla khutla. Leha ho le joalo, bao ba ile ba toba morao moo ba nt’o hula Lekhoele ebile ba mo khitlile ka sethunya sefubeng ba tsoa le eena ka beseng ba mo koetela.
Ho sa le joalo, Adv. Molati ha a kena bopaking bo tekiloeng, o botsitse PC Nkhahle na o tseba batho ba ileng ba nka babelaelloa linepe empa a fetola ka hore che.
Adv. Molati o behile kapele ho paki hore polelong ea tlatsetso (supplementary statement) e entsoeng ke eena ha ho na moo a kentseng teng hore babelaelloa ba ile ba kopa ho se lokolloe ekasitana le hona ho kopa ho siea kobo.
Ha a qetella o ile a botsa paki hore na ‘molai Rantaoana ha a fana ka tlhaloso ea se bakileng hore a thunye lesole ke efeng ‘me paki e ile ea fetola ka hore Rantaoana o ile a re o ne a nahana masole ao ke ba bang ba lihlopha tsa Famo ba lireng ‘me ba ne ba il’o mo hlasela kaha ba ne ba tsoa lefung la setho sa fenefene.
Kamora moo Adv. Molati o ile a fella hakaalo ka lipotso ‘me lekhotla la nka khefu.
