BO-KABI BA HLAHA KHOTLA KA BOSHOLU
Ka Moipone Makhemeng
La 1 Pulungoana 2023
Banna ba bararo, Kabi Bachisi (22), Kafi Bachisi (25) ba Baroeng, Ha Majara, Maseru le Moeketsi Motikoe (32) oa Ha Molibeli, Hlotse, Leribe ba hlahile lekhotleng la ‘Maseterata oa Maseru, Nthabiseng Moopisa ba balloa qoso ea bosholu ba boqhobane.
Ho thoe ka la 29 Loetse 2023 baqosuoa ba ile ba pshatla koloi ea linomoro-polata tsa MP 352 e neng e le tlhokomelong ea e mong Liketso Mochesane, ntle ho tumello ea hae ba le haufi kapa Ha Makhoathi, Maseru ‘me ba utsoa k’hamera e nts’o ea moetso oa Canon, track top ea Nike, liborene tsa letsatsi tsa letšoao la Redbat le chelete e kaalo ka M750.
Baqosuoa ba fuoe beile ea M600 kaofela
Kamora ho balloa qoso le ho bolelloa litokelo tsa bona, ‘muelli oa moqosuoa oa bobeli le oa boraro – Kafi le Motiki, Adv. Mohlouoa o ile a ba kopela beile ka le reng bobeli ha ba kenya letsoho ho pshatleng koloing esita le ho utsoa thepa e boletsoeng. A bonts’a hore bona e bile bareki feela ba thepa eo; kaha ha se bona ba pshatlileng koloi le ho utsoa thepa kaha ba e rekile ba sa tsebe hore ke ea bosholu.
Ho feta mona, leqoetha ha le itela bootloana le bolelletse ‘maseterata hore Kafi o na le ngoana ea lilemo li ‘ne le lelapa leo e leng mohlokomeli oa lona a le mong kaha mosali oa hae a sa sebetse. Adv. Mohlouoa o boetse a tekela lekhotla hore Kafi o thusitse sepolesa ka lipatlisiso hape a ba le seabo hore moqosuoa oa pele a ts’oaroe.
Akhente ea tsoela-pele ho bonts’a hore moqosuoa oa boraro, Motiki ka tsela e ts’oanang, ke eena mohlokomeli oa lelapa a le mong. O na le ngoana ea lilemo li peli. Ho feta mona, a supa hore Motiki oa sebetsa ‘me ha a ka koalloa chankaneng mosebetsi oa hae o tla ba tsietsing hoba mesebetsi e ea sokoleha.
A lihella likhala ka hore babuelloa ba hae ba tla ba teng nako eohle ha lekhotla le ba hloka.
Ho sa le joalo, moqosuoa oa pele, ha a ikopela beile o buile ka moea o fats’e a re o molato qosong ea bosholu. O itse ha a sebetse o ntse a its’okola. A boela a bonts’a hore ha a e-s’o nyale empa o sentse ngoan’a motho ‘me lesea ke hona le leng likhoeli li tharo.
Kamora likopo tsa beile baqosuoa kaofela ba ile ba fuoa beile ea M600 motho ka mong tlas’a lipehelo tsa hore ba tla tsamaea lirimante hape ba se kena-kenane le lipaki tsa mofapa-hlooho.
Mochochisi nyeoeng ena ke monghali Lefu Rats’ita ‘me ha ka hanyetsa beile. Kafi le Moteki ba atlehile ho itefella beile ha Kabi a hlolehile ‘me o tla tsoa a ntse a emetse nyeoe a le ka setsing sa bats’oaruoa.
Ba tla hlaha hape lekhotleng ka la 14 Pulungoana 2023.
