BANKA E KHOLO E THAKHOLA TEFO EA HANG-HANG
Ka Moipone Makhemeng
La 21 Tlhakubele 2024
Banka e Kholo ea Lesotho (Central Bank of Lesotho – CBL), e thakhotse mokhoa o mocha oa ho lefa hang-hang o bitsoang Leswich. CBL e phatlalalitse sena maobane ‘mokeng oa baqolotsi, Lehakoe Recreational Centre Maseru.
Sehlahisoa se secha sa tefo se tlil’o sebetsa ho basebelisi bohle ba libanka tsa Lesotho. Ho feta mona, basebelisi ba mekhoa e meng ea litefo ka mehala le bona ba tla tseba ho sebelisa sehlahisoa sena ho fetisa chelete e leng; Ecocash, M-Pesa, Khetsi, Chaperone le My Wallet.
Basotho ba tlo nolofalloa ho romela chelete lipakeng tsa libanka le phetiso ea chelete ka mehala. Mohlala, ha u na le Mpesa, u tla tseba ho romella chelete ho mekhoa e meng joaloka; Ecocash, Khetsi, Chaperone kapa My Wallet.
‘Musisi oa Banka e Kholo Dr. Maluke Letete o itse litefo ka sehlahisoa sena li tlil’o bebofatsa tšebelisano tsamaising ea chelete. Mohlala, Letete o boletse sena se tlil’o matlafatsa kholo ea moruo le ho khothalletsa tsamaiso e ntle ea lichelete.
“Re na le chebelo-pele e ntle ka tsamaiso ea lichelete. Lefapha leo le loketse hore nako ena kaofela le re thuse hore re se ke ra ba le bothata tsamaisong ea lichelete.
“Empa karolo eo re nang le ponelo-pele e bohlokoa tšebetsong ea kholo ea moruo le ntlafatso ea sechaba. Re loketse re-be hlokolosi haholo litabeng tsa bosholu ba ho hlatsoa chelete (money laundering).” O hlalosa joalo.
Dr. Maluke Letete, ‘Musisi oa Banka e Kholo
Dr. Letete o re leha ho le joalo, ho lokela ho hlokomeloe botlokotsebe ba litlhaselo tsa marang-rang (cyber attacks) kaha ho tloha hona joale motho o se a tlo tšoara lipolokelo tse ngata tsa batho.
Ho sa le joalo, Motlatsi oa ‘Musisi oa Banka e Kholo, monghali Lehlomela Mohapi o thatisellelitse ka hore mokhoa oa ho lefa hang-hang oa Leswitch, o thakhotsoe ke Banka e Kholo ho qobisa Lesotho ho itšetleha ho Afrika Boroa. Ka hona, o re CBL e ile ea ikeletsa hore e-be le sehlahisoa sena.
Lehlomela Mohapi, Motlatsi oa ‘Musisi oa Banka e Kholo ea Lesotho
“Pele ho Covid-19, ho ile hoa fihla taba kapele ho ‘na bankeng mono. Ke ne ke le molula-setulo oa komiti ea banka e sebetsanang le lithentara eaba ho fihla taba e reng banka e batla ntho e bitsoang National Payment Switch.”
Lehlomela o ile a hlalosa hore Leswitch e tlo sebetsa ka tsela ena:
“Haeba u patala ka karete ea banka ho speed point , joale tefello eo ea hau e ne e fetisetsoa Gauteng. Honajoale ka sehlahisoa sena, litefello le phetiso ea chelete li tlo etsoa kahara Lesotho, li be li felle kahara naha.
Baemeli ba litsi tsa phetiso ea lichelete ka mehala le libanka
Mohapi o lihelletse likhala ka ho toboketsa hore thekenoloji e ntse e fetoha le ho pharalla kaha ho na le Fin Tech, Mobile money le tse ling lihlahisoa tsa sejoale-joale. O re khatelo-pele hape e bile ho felisa tšebeliso ea lipampiri-chelete kahara naha ea Lesotho.
