BAITŠOKOLI BA LLA KA LITEFISO TSA ‘MASEPALA
Ka Moipone Makhemeng
La 18 Hlakola 2024
Baitšokoli ba sebeletsang ‘marakeng o haufi le Ha Mafafa, ‘mileng oa Kingsway, Maseru ba lla ka hore ‘Masepala (Maseru City Council – MCC) o batla ho ba hanyapetsa ka ho ba lefisa M350 khoeli le khoeli ha bona ba ne ba lefa M36 feela ka selemo.
Monghali Mohale Manyabutse, molula-setulo komiting ea baitšokoli sebakeng seo, puisanong le baqolotsi o itse ha ba khotsofalla ho sebeletsa sebakeng seo ba lefisoang M36 kaha se khoshelletsaneng moo bareki ba leng sieo. Hape o lla ka sebaka seo hore ha se ea bolokeha; se ea nela nakong ea lipula.
Manyabutse o bontšitse ha ‘Masepala a ba tlatlapa kaha ba ile ba etsa qeto ea ho tloha sebakeng se khosheletsaneng, ba ikatametsa sebakeng sa ‘maraka moo ho nang le bareki le khoebo e betere.
Sebaka sa ‘maraka Ha Mafafa, seo baits’okoli ba reng se khocheletsaneng ebile se ea nela nakong ea lipula
“Re ile ra bitsoa ka bonngoe ke ‘Masepala ra qobelloa ho lefa M350 ka khoeli empa re sa fuoa monyetla oa ho hlahisa maikutlo a rona tabeng ena. ‘Masepala ha a na matla a ho tlola mekhatlo ea rona ebe o theohela ho rona mona joaloka phakoe e hloibila litsuonyana.” O phahamisa sello joalo Manyabutse.
Ho sa le joalo, Leihlo la Basotho le atametse raliphatlalatso oa MCC, mofumahali ‘
Mosala ho hlahisa maikutlo sellong sa baitšokoli. Ha a beha lehlakore, Mosala o boletse baitšokoli ba sebeletsang Ha Mafafa ba le likarolo li peli; ho na le ba behiloeng ka molao le baipehi ba sebeletsang moo ka thoko ho molao.
“Baitšokoli bano ba llang ke baipehi; ba siile libaka tsa bona kahara ‘maraka ba tla ka nqena, e leng hore ba nkile libaka tse peli kahara ‘maraka. Mona moo ba tlileng ke baipehi.” Mosala o beha joalo.
Ntlheng ea hore na ba ile ba rerisa baipehi bao hore ba tla lefisoa M350, Mosala o bontšitse bahoebi ba amehileng ba ile ba bitsoa le ho tsebisoa ke ‘Masepala hore ba lefe kapa ba khutlele libakeng tsa bona (moo ba lefisoang M350).
“Re ba bolelletse hore ba lokela ho lefa M350 e seng joalo ba khutlele moo ba ne ntse ba sebeletsa pele.” Mosala o lihella likhala.
Ho sa le joalo, baitšokoli ba bang ba lla ka hore ba lefisoa joalo, feela ba sokola metsi. Ba meketsa ka hore matloana le ‘ona a koetsoe: “Kannete rea ipotsa hore na ‘Masepala o re re iphilise hokae.” E mong o qetella joalo.
