BAITHUTI BA NUL BA NGALA LIHLAHLOBO BA KENA BOITSEKONG
Ka Moipone Makhemeng
La 25 Motšeanong 2023
Baithuti ba Sekolo se Seholo sa Sechaba (National University of Lesotho – NUL) ba fihletse qeto ea ho ngala lihlahlobo hofihlela nako e sa tsebahaleng kamora ho kena boitsekong maobane mapatlelong a sekolo.
Ho ea ka e mong oa baithuti ea buisaneng le koranta ena, litho tsa Komiti ea Lekhotla la Baithuti, Student Representative Council (SRC) li ile tsa ba le kopano le Lefapha la Lihlapiso e leng National Manpower Development Secretariet (NMDS) moo baithuti ba ileng ba tekela lefapha hore ba hloka ho fumantšoa litsiane ha khoeli ena e fela kaha ba tla be ntse ba le lihlopheng hofihlela la 15 Phuptjane 2023.
Ho ea ka tlhaloso, NMDS e ile ea hlalosa ha e sa fumana litaba tse joalo ‘me e tseba alemanaka ea sekolo e supa ha likolo li koaloa ka la 28 khoeli eona ena e holimo.
Ho feta mona, tlhaloso e bonts’a hore kamora hore baithuti ba bonts’e bopaki ba hore e se e le khale sekolo se etselitse lefapha leo molaetsa ka lengolo ho ba tsebisa ‘me le bone hore ho fela ho le joalo, NMDS e ile ea bontša e tla etsa makhobonthithi a hore baithuti ba fumantšoe litsiane le hoja ba bontša ha e tla ba ho tloha ka baithuti ba selemo sa bobeli.
Ke moo qaka e ileng ea qhoma teng kaha komiti ea lekhotla la baithuti e ile ra bontša hore e batla hore baithuti bohle ba fumantšoe lihlapiso ‘me NMDS e ile ea bontša e le hona e tla lo batla mokhoa oa litsiane.
Ke moo ho khutleng hoa komiti pina e ileng ea qalella ha baithuti ba qetella ka ho beha lipene fatše ba emisa ho ngola litlhahlobo.
Ho sa le joalo, shoalaneng ea maobane baithuti ba ile ba ntša pamphitšana (flyer) e bontšang hore ba fihletse qeto ea ho koala sekolo hofihlela ‘muso o file baithuti ba sa lefelloeng lihlapiso joalokaha o itlamme ka ofisi ea tonakholo le kabinete ka kakaretso.
Ho feta mona, ba bontša hore ba tla tsoa ba ntse ba koetse hofihlela ‘muso o fane ka tiisetso ea hore baithuti bohle ba tla fumana lihlapiso tse felletseng le chelete ea rente ho tloha ka la 1 Phuptjane 2023.
Ho sa le joalo, ntlha ea bona ea ho qetela ke hore ba tla tsoa ba ntse ba lutse fatše hofihlela ba phethetse ho tekenela liporojeke tsa baithuti ba tsoileng ho ea ithuta tšebetso libakeng tse fapaneng (attachments).
