BA ROHAKANANG FACEBOOK BA HLAHA KHOTLA
Ka Moipone Makhemeng
La 6 ‘Mesa 2023
Basali ba babeli kajeno ba hlahile lekhotleng la ‘maseterata oa Maseru ka pele ho ‘maseterata Itumeleng Letsika ba qosoa ka ho hlapaola e mong ‘Mapaseka Sekantši ho marang-rang a Facebook.
Moqosuoa oa pele ke Mary Mochobi (32) ea ipitsang ‘Makahlolo ho Facebook oa Tšenola Motse-Mocha, Maseru ha Morena Moeketsi Mothobi. Moqosuoa oa bobeli ke ‘Malehlohonolo Tumakote (31) kapa Bolelang Bobore ho Facebook oa ha morena Motiki Mapola, Thaba-Tseka ea lulang Ha Leqele e bile e le moithuti Limkokwing University.
‘Maseterata Itumeleng Letsika
Ho ea ka lengolo la qoso, bobeli bo qosoa ka ho tlola lipallo tsa litemana tsa 78 le 109 tsa Pokello ea Litlolo tsa Molao (Penal Code, 2010) ka hore ka Hlakola 2023 sebakeng se sa tsejoeng seterekeng sa Maseru ba sebetsa ka morero o tšoanang ka thoko ho molao le ka maikemisetso ba ile ba ngola lipolelo tse jereng mahlapa le lehloeo khahlanong le e mong Mapaseka Sekantši ba mo tsekisa bothata ba hae ba ho se be le bana ka ho mo rohaka ka hore ke nyopa le mahlapa a mang a hlohlontšang litsebe.
‘Maseterata Letsika o ile a ba hlalosetsa litokelo tsa bona ekasitana le ho ba tsebisa tokelo ea ho ipatlela ‘muelli oa khetho ea bona hore a tle a ba kopele beile.
Kamora moo, Adv. Maope o ile a itlhahisa ho lekhotla e le ‘muelli oa baqosuoa ‘me o ile a ba kopela beile. Maope o ile a itela ho lekhotla hore moqosuoa oa pele Mary Mochobi o phelisa ngoana hae a le mong a re a ke ke a baleha. Athe moqosuoa oa bobeli ‘Malehlohonolo Tumakote, Adv. Maope o mo hlalositse e le moithuti Limkokwing University le hore o na le bana ba babeli. A supa hape hore moqosuoa o bile le tšebelisano-‘moho le sepolesa nakong ea lipatlisiso.
Mochochisi Khaile h’a ka hanyetsa kopo ea beile eaba ‘Maseterata Letsika o ba lokolla ka beile ea M1000 moqosuoa ka mong tlasa lipehelo tsa hore ba itlalehe khotla ha ba batloa ekasitana le ho se kena-kenane le lipaki tsa mofapa-hlooho.
Baqosuoa ba tla hlaha khotla hape ka la 18 ‘Mesa 2023.
