BA HULELA MATEKANE KHOTLA
Ka Moipone Makhemeng
La 28 Tlhakubele 2023
Litho tse peli tsa Revolution for Prosperity (RFP), Moloi Ralentsoe le Cowboy Sethati ba hlahletse nyeoe Lekhotleng le Phahameng, Maseru maobane khahlanong le Komiti e kholo ea RFP ho kenyeletsa moetapele Samuel Ntsokoane Matekane ekasitana le Nthomeng Majara, Nthati Moorosi, Retšelisitsoe Matlanyane, Mokhethi Shelile, Telang Takane, Metsing Lemphane, Thabo Maretlane, Lebona Lephema, Komiti e kholo ea RFP, Mongolisi oa mekhatlo, IEC le Ramolao e Moholo oa ‘Muso.
Seboko sa bona sa mantlha ke hore komiti e kholo ea RFP e lutse ka thoko ho molao. Balli ba beha thapeli ho lekhotla hore ho bitsoe litho tse hlaellang qosong li qobelloe ho bitsa seboka sa khetho ea komiti e kholo. Ba boetse ba batla hore lekhotla le laele moqosuoa oa pele ho isa oa leshome le metso e ‘meli ho khaotsa ho ipitsa litho tsa komiti e kholo ea RFP.
“Re batla lekhotla le tšoare matsoho moqosuoa oa pele ho isa oa leshome ho se tšoare likhetho tsa boemo bofe kapa bofe pele bona ba ka khethoa e le litho tsa komiti ea RFP ho ea ka molao oa motheo oa RFP.” Ke thapeli ea baqosi lipampiring tsa lekhotla.
Ba boetse ba re lekhotla le laele baqosuoa ho hlophisetsa seboka sa likhetho tsa komiti e kholo ‘me se be nakong ea matsatsi a 20 kapa eo lekhotla le ka fumanang e nepahetse ho seng joalo seboka se neng se hlophisitsoe ke komiti ea nakoana ho ea ka moo lekhotla le ka bonang ho tla nepahala.
