ALLIANCE FRANÇAISE E THAKHOLA LIPONTŠO
Ka Moipone Makhemeng
La 6 Phuptjane 2023
Setsi sa Alliance de Française Maseru, ka la 2 Phuptjane 2023, se thakhotse ka molao lipontšo tse tl’o tšoaroa bekeng ena kaofela. Lipontšong tsena ho tla amoheloa barutoana ho hlaha likolong tsa Maseru le mathoko ea eona.
Motsamaisi oa Alliance Française de Maseru, Elizabeth Douillet o hlalositse lipontšo tsena li etsoa ka kopanelo le setsi sa Morija Hub. Nakong ea thakholo ea lipontšo, ho ile hoa pepesoa litšoantšo tse nkiloeng ke bo-ralifoto ba lehae malebana le ho hlokomelisa sechaba ka tlokotsi e tjametseng tšenyeho ea tikoloho, hammoho le le tšilafatso ea tikoloho Lesotho.
Douillet o ile a hlokomelisa bacha ka phetoho ea maemo a leholimo, a re Alliance Française hammoho le balekane ba eona, e rerile ho etsa sena ka mokhoa oa botaki le bonono kaha ke mekhoa e metle ea ho fetisa melaetsa ea paballo ea tikoloho.
E mong oa bo-ralifoto ho hlaha Morija Hub, Limpho Thoahlane o ile a teka puo e hlalosang litšoantšo tse nkiloeng ke bo-ralifoto.
Boha litšoantšo ho slide show li ea latela:
Liponts'uoa la lits'oants'o
Liponts'uoa la lits'oants'o
Ba tlileng liponts'ong
Ba tlileng liponts'ong
Bo-ralifoto le Elizabeth Douillet, (ea hare)
Ralifoto
Ea tlileng liponts'ong
Limpho Thoahlane
Limpho Thoahlane
Limpho Thoahlane
Limpho Thoahlane
Thoahlane o ile a rapalatsa hore ba ithutile ha ba le Matsieng le Morija hore Basotho ke batho ba se nang thahasello le tsotello litabeng tsa phetoho ea maemo a leholimo. O bontšitse hore ntho eo ba leng thahasellong ea eona ke hore na ba ja joang.
O ile a bontša hore Basotho ba mehleng ba ne ba aha matlo a bona ba shebile hore na ho fetoha hoa leholimo ho ba ma joang kaha ha ho bata matlo a bona a ne a bokella mofuthu athe ha ho chesa a pholile.
Thoahlane o boetse a ipiletsa hore ho loketse ho khutleloe morao e le ho ikamahanya le maemo a phetoho ea leholimo. Ho feta mona, o ile a rapalatsa hore mabapi le ho bokella lithole, ho fumana batho ba hloekisang ha se mokhoa o sebetsang hantle kaha ho tla phuthoa ebe ho bokelloa sebakeng se itseng feela ebe qetello ea lithole tseo li felella li sa qhoaloe ka mokhoa o nepahetseng.
Thoahlane o ferile puo ka ho supa hore Lesotho le hloka meralo ea motheo ea taolo ea maemo a tšilafatso ea tikoloho, a re ho lokela ho be le maoala a ho sebelisa thepa e sebelitseng hape (recycling). O ipilelitse ho batho bohle ho ba le seabo litabeng tsa maemo a phetoho ea leholimo.
