BANKA E KHOLO E KHOBA SECHABA MATŠOAFO
Ka moqolotsi oa rona
La 8 ’Mesa 2024
Banka e Kholo ea Lesotho (Central Bank of Lesotho – CBL) e bile le ‘moka oa bo-ralitaba ka Labohlano ho hlakola mafosisa a ileng a ipetsa ekasitaba le ho khoba sechaba matšoafo.
Mafosisa a ne a re phethiso ea lichelete ka marangrang a Electronic Funds Transfer – EFT ho tloha ho Lesotho ho ea linaheng tse ling e tlo emisoa.
Mookameli oa Lipatala CBL, monghali Mothetsi Sekoati o otlollotse taba ka ho phubula mafosisa a re seo e leng taba ke hore phetiso ea lichelete ka EFT e etsahalang linaheng tsa selekane sa linaha tse sebelisang Ranta (Common Monetary Area – CMA) ho entsoe qeto ea ho kenya tšebetsong mokhoa oa hore batho ha ba romella lichelete ka EFT ho tsejoe hore na batho bao ke bo-mang hohle moo ba leng teng.
Mothetsi Sekoati
“Linaha tsa CMA ke Namibia, Eswatini, Lesotho le Afrika Boroa ‘me tsona li khetholla ka hore li sebelisa Ranta, le chelete ea linaha tsa tsona.” Sekoati oa hlalosa.
O itse ho tloha khale phetiso ea lichelete tse ka tlaase ho M5 milone (low value cross border payments) kahara CMA e ne e etsoa joalokaha eka lichelete li tloha Afrika Boroa kaofela.
“Taba ea ho nkoa hoa chelete ena e hlaha eka e tsoa Afrika Boroa leha e tsoa linaheng tse ling joaloka Lesotho, Eswatini le Namibia e bonahetse e tlola melao e meng ea machaba mabapi le thibelo ea tlhatsuo ea chelete le ho thusa bokhukhuni ka lichelete.” O rialo.
A re ha Mosotho a patala, a romella chelete Afrika Boroa tefello eo e nkoa joalokaha eka ke ea Afrika Boroa, ‘me ha e bonahale hore ke ea Lesotho, Eswatini kapa Namibia. A re taba eo e baka bolutu kaha Afrika Boroa e hloloa ho hlalosa hore na litefello tse joalo li tsoa kae, ho bo-mang.
Maletsunyane Braai Festival Phase 2 tickets
A supa hore lichelete tsa low value cross border payments, Basotho ba li romella ka lifono tsa bona, kapa likomporo, joale bothata ke hore ke libanka tsa Lesotho feela tse tsebang hore motho ea romellang chelete e joalo ke mang empa Afrika Boroa eona hae e tsebe letho.
A re ba tlil’o kena tšebetsong e le CMA ho thibela linokoane ho fetisa chelete li sa tsejoe. Ho ea ka Sekoati, ba tlameha ho kenya tšebetsong mehato ea hore batho ba fetisang chelete ba tsebahale le lehlakoreng la Afrika Boroa.
“Re ile ra ikeletsa re le linaha tsa CMA hore boemo bona bo ke ke ba tsoela-pele tlas’a mathata ana a ntseng a le teng. Lebaka le leholo ke hore ha re hoebe feela re le linaha tsa CMA empa re hoeba le linaha tse ling kahara SADC le lefatšeng ka bophara.
“Ho bohlokoa hore batho bao re hoebisanang le bona ba utloisise hore ba hoeba le batho ba etsang lintho ka moo li lokelang ho etsahala ka teng hore ba be le tšepo hore ha u romella chelete e tloha Lesotho e leba UK kapa India, u tsebe hore e tsoa sebakeng seo ho lumellehileng hore re ka hoeba le sona.” Sekoati oa hlalosa.
A totobatsa hore linaha tse ling ha li romela chelete Lesotho li lokela ho tseba hore ha li sebetse le sentele sa masholu.
“Ke lona lebaka le entseng hore ho tsebahale hantle hore na u mang ha u patala litšebeletso Afrika Boroa, Namibia le Eswatini. E le ho ikobela lepehelo tsa machaba.”
O phatlalalitse hore balaoli ba CMA ba elelitse hore phethiso ea lichelete ho ea linaheng tse ling e sebetsoe ka ho behoa boemong ba regional infrastructure meant to process cross border payments from September 2024.
Litaba tsena li tla qala ka Loetse 2024 ‘me banka e hlokometse pherekano tabeng ena hore e thomehile kae le hore e tlo tšoaroa joang. Litsi tse ling tsa phatlalatso li phatlalalitse hore EFT payments shall not be permitted within CMA. Taba ena ke mafosisa a khelosang sechaba.
Ke ema mona ke tiisa hore ha matlafatso tsena li lokisoa hore ntho li tsamaee hantle, ha ho bolele hore Mosotho o tla hloloa ho romella chelete Afrika Boroa ka EFT, e ntse tla tsoela-pele empa ho sebelisoa mecha e nepahetseng.
Ho boetse ho bile le litlaleho ho tsoa litsing tse ling tsa phatlalatso hore Ma-Afrika Boroa a tlo sitoa ho fetisetsa chelete ka EFT ho ea Lesotho, Eswatini kapa Namibia; taba ena ke mafosisa a reretsoeng ho thetsa sechaba.
Sekoati o phethetse ka ho tiisetsa sechaba hore nakong eo ho ntseng ho etsoa tšebetso ea hore beng ba lichelete ba tle ba tsebahale hohle, balaoli ba CMA ba tlo sebetsa ka boitelo hore litšebeletso ho sechaba li se amehe ka tsela efe kapa efe.
“Re lakatsa ho tiisetsa sechaba hore phetiso ea lichelete ho ea linaheng tse ling e tla ‘ne e itsoelle-pele kahara CMA ho sebelisoa mekhoa e nepahetseng ea phetiso ea lichelete ho shebuoe ka hloko hore litjeo li nyolohe.” O fera litaba joalo.
