MASOLE A BOTSWANA A HULOA MOZAMBIQUE

MASOLE A BOTSWANA A HULOA MOZAMBIQUE

Ka moqolotsi oa rona

La 8 ‘Mesa 2024

Ka Phato ngoahola, Mokhatlo oa Kopano ea Linaha tsa Ntlafatso ea Moruo Afrika e ka Boroa (Southern African Development Community – SADC) o ile oa nka qeto ea ho ho hula lebotho la oona la SADC Mission in Mozambique (SAMIM) naheng ea Mozambique. Qeto e ile ea fihleloa ke lihlooho tsa linaha le mebuso sebokeng se ikhethang Luanda, Angola ka la 17 Phato 2023.

SADC e ile ea romela masole ho ea thusetsa sesole sa Mozambique ka 2021 nakong eo marabele a neng a tsoile taolong a hapile litoropo tse ling tsa porofinsi ea Cabo Delgado.

Ho ea ka SADC, masole a tla huloa ka mekhahlelo ‘me ka la 15 Phupu 2024, ho tla phetheloa khulo ea mabotho ka ho phethahala .

Ho sa le joalo, ka la 5 ‘Mesa 2024, SAMIM e qalile ho hula mabotho ho qala ka lebotho la Botswana le ileng la fihla Cabo Delgado ka Mphalane 2021. Balaoli ba SAMIM ba ile ba tšoara tšebeletso ea khulo ea masole a Botswana moo ho bileng teng ea tšoereng molepo e le Hlooho ea Letšolo la SAMIM, Monghali Shikongo Shikongo, Molaoli e Moholo oa SAMIM, SAMIM Force Commander Major General P.N. Dube, moemeli oa sesole sa Mozambique, Brig Gen T.E Paumbele le baemeli ba masole a linaha tse ling tsa SADC.

Hlooho ea Lebotho la SAMIM e ile ea etsa puo ea leboha mabotho ‘ohle a SADC a bileng letšolong lena ho e hlanaka khahlanong le marabele. Har’a likatleho tsa SAMIM, masole a Botswana a atlehile ho khaola marabele lipheeo hape a ba le seabo mererong ea ho khutlisetsa baphaphathehi ba neng ba balehile metseng ea bona ka lebaka la marabele.