BNP E TŠELISA MA-RUSSIA
La 24 Tlhakubele 2024
Batho ba ka bang 83 ba timetse ha bo-rasethunya ba itšohlometsa holong ea likonsarete ea Crocus City Hall, motse-moholo oa Russia, Moscow ka Labohlano. Phatlalatso ea ‘muso oa Russia e re banna ba hlometseng ka merathatha ba neng ba apere seaparo sa sesole (camouflage), ba ile ba itšohlometsa ka holong ba se ntse ba thunyetsa ho batho, ba bile ba akhela kharenate ea letsoho e ileng ea chesa holo. Ho lemetse batho ba fetang 100 tlhaselong ena.
Kamora tlhaselo, likoeta li tlalehoa li ile tsa ipha limenyane ka koloi ea moetso oa Renault. Mokhatlo oa marabele oa ISIS o ipoletse e le beng ba ketso ena.
Ha boemo bo le tjena, moeta-pele oa Basotho National Party (BNP), Machesetsa Mofomobe o fetisitse molaetsa oa matšeliso ka ho ngolla molula-setulo oa mokha o busang Russia oa United Russia Party, mohlomphehi Dmitry Medvedev. BNP e na le setsoalle sa nako e telele le mokha o busang Russia kaha Ma-Russia a ile a ema le mothehi oa BNP, Morena Leabua Jonathan linakong tse thata.
Lengolo le re: “Basotho National Party e utloile bohloko ke ketso ea bokhopo ea likhukhuni tse hlasetseng Crous Hall moo baahi ba Russia ba lahlehetsoeng ke bophelo. Ke rata ho fetisa matšeliso ho tsoa botebong ba pelo le kutloelo-bohloko ho sechaba sa Russia hammoho le malapa ‘ohle a amehileng. Ketsahalo ena ke khopotso ea kotsi e bakoang ke marabele a ikemiselitseng ho luka khotso ea lefatše.” O rialo molaetsa oa BNP.
