ALLIANCE E KETEKA LILEMO TSE 30 E THUSA SECHABA
Ka Moipone Makhemeng
La 22 Tlhakubele 2024
Ke lilemo tse mashome a mararo (30) k’hamphani ea lehae ea li-inshorense, Alliance Insurance Company esale e sebetsa e le lejoe la motheo le tšepahallang Basotho.
Bekeng ena, ka la 19 Tlhakubele 2024, Alliance e ketekile le ho tšoaea lilemo tse 30 e thehiloe ka ho khutlisetsa sechabeng chelete e ka holimo ho M1 milone mafapheng a fapaneng a sechaba.
Raliphatlalatso oa Alliance, Limakatso Mokobocho o bontšitse ha a thabetse ketsahalo ena ea bohlokoahali ka ho amela baqolotsi likatleho tseo Alliance e li fihletseng e le ho keteka le sechaba sa Basotho se ba tšehelitseng.
Limakatso Mokobocho, ofisiri ea liphatlalatso Alliance
O tlalehile hore Alliance e ts’ehetsa lihlopha tse kholo tsa bolo ea maoto tse ‘ne ka lichelete; Lioli FC, Matlama FC, Linare FC le Lesotho Correctional Services FC. “E le ho ts’oaea lilemo tsena tse 30 re tlil’o rekela lihlopha tsena seaparo.” O beha joalo Mokobocho.
“Selemong se fetileng, Alliance e ne e qeta lilemo tse mashome a mararo e thehiloe. Re ile ra sheba morao ra re; ebe re fihlile joang moo? Karabo e ile ea e-ba hore re fihlile ka tšehetso ea Basotho. Re fihlile mona hobane Basotho ba ile ba khetha hore ba re lumele ba sa re tsebe ba tela lichelete tsa bona ka ho kena mokhatlong oa rona.” Mokobocho o hlalosa tsa kholo ea Alliance.
O tsoetse-pele ho supa hore ba ile ba bona ho le bohlokoa ho keteka le Basotho. A bontša ha ba ile ba sheba pele batho ba tlokotsing ea phepo e fosahetseng (malnutrition). O re ba ile ba hloaea mekhatlo e phuthileng bana mapatlelong a literopo le seterateng, sekolo sa Mphaki esita le lihlopha tsa bolo tse ‘ne tseo ba li tšehetsang e le mokhatlo.
“Re ile ra qala ho sheba pele batho ba tlokotsing. Eaba re ea elelloa hore kahare ho naha ho na le bothata bo boholo ba phepo e sa nepahalang, e leng ntho e bitsoang malnutrition. Eaba re qalella hore le rona ha re sebetsa ho rekisa inshorense joalo re ke re kenye letsoho ho loantša taba ea malnutrition.”
Ha a tsoelapele, o boletse hore ba ile ba ikopanya le mokhatlo oa Baylor Foundation kaha o se ntse o sebetsa le litliliniki tse hlano literekeng tse hlano moo ba hlokometseng bana ba tlokotsing ka bokulo esita le bo bakiloeng ke phepo e fosahetseng.
Matlama e hlahisa ho Alliance, mohope oo e o hapileng ho People’s Cup
“Re ile ra reka ntho eo ho thoeng ke fortified mealie meal, e leng phoofo e nang le limatlafatsi. Phoofo eo re faneng ka eona e bile ea boleng ba M300 000 e leng hore e ile ea anela bana literekeng tse hlano.” Oa hlalosa.
Ho feta mona, o ile a supa ba ile ba utloela ka sekolo sa Kelibone Primary School, Mphaki, Quthing moo moaho oa borutelo o neng o nela nakong ea lipula. Mokobocho o ekelitse ka hore barutuoa ba sehlopha sa pele ho isa sa botšelela ba ne ba kenela sehlopheng se le seng.
Lebitsong la lihlopha, mopresitente oa Linare FC, monghali Themba Sopeng o boletse ba le motlotlo ke tšehetso eo ba e fumanang ho tsoa Alliance. A boela a thoholetsa Alliance ka leeto le leholo le shebahalang le ntse le tsoela-pele la tšehetso.
Themba Sopeng, Mopresitente oa Linare FC
Ka ho khetholoha, Sopeng o ile a hloaea le ho babatsa Alliance ka ho kena tšebetsong litabeng tsa phepo e nepahetseng tseo a boletseng ha Motlotlehi hlooho ea naha e le moeta-pele linaheng tse ikopantseng tsa Afrika mabapi le phepo e nepahetseng.
Ho feta mona, Sopeng o entse khoelehetso ho batšehetsi ba lihlopha tsa bona ho tsoela-pele ho eketsa tšehetso ho balateli ka ho reka lihlahisoa tsa Alliance e leng ho kena li-inshorense tsa eona.
Lihlopha tse ts’ehetsoang ke Alliance
E le ho phethela mosebetsi oa letsatsi, Ofisiri e kholo ea Lichelete ea Alliance, Chief Financial Officer – CFO) Mohapinyane Taole o ile a lebohela Matlama FC ka ho hapa khau ea People’s Cup bekeng e fetileng. A re seo Matlama e se entseng ke ho bontša kananelo ea tšehetso eo ba e fumanang ho Alliance.
Mohapinyane Taole, Alliance Chief Financial Officer – CFO
A re morero oa Alliance ke ho tšehetsa lihlopha tsa bolo Lesotho ho atlehisa moralo oa bona oa hore sehlopha sa bolo ea Lesotho se tsoele-pele ka katleho le ho hlahella esita le ho ba le seabo lipapaling tsa bolo machabeng hofihlela e emeloa ho World Cup.
