SEPOLESENG LI JANA MARO NTJA TSA SETSOMI
… “Ha ke ntša likhapha motho oa shoa”
La 1 Hlakola 2024
Ka moqolotsi oa rona
Ramatlotlo e Moholo komiting ea mokhatlo oa mapolesa (Lesotho Police Staff Association (LEPOSA), Mofumahali ‘Mathebe Motseki, o behelletsoe ka thoko ho mosebetsi oa ramatlotlo ka le reng ho sa fuputsoa boitšoaro bo bobe boo a bo bontšitseng kahara mokhatlo.
Lengolo le behellang Motseki ka thoko ho tšebetso le tekenetsoeng ke mongoli-kakaretso, ‘Makatleho Mphetho la la 31 Pherekhong 2024 le supa hore komiti e kholo tulong ea la 30 Pherekhong 2024, e entse qeto ea ho behella ramatlotlo ka thoko ho tšebetso molemong oa ho thakhola lipatlisiso khahlanong le eena. Tsona li mabapi le seo mokhatlo o reng o bontšitse boitšoaro bo bobe ka ho roba melao ea LEPOSA le molao oa motheo ka ho etsa joalo.
‘Makatleho Mphetho – Mongoli-Kakaretso oa LEPOSA [Image supplied]
Taba ea bobeli, ho thoe: “Hona mohla kopano ea la 10 Tšitoe 2023, ramatlotlo o ile a bua mantsoe a latelang: “Le tle le bone kamora three months na ho tla be ho etsahetse joang ka Thaele le lelapa la hae. ‘Na ha ke lla, ke ntša likhapha motho oa shoa, bashanyana bana ba ntella.” Lengolo la LEPOSA le rialo le bile le bontša hore monghali Hlaheng o tla tšoara mokobobo oa ho ba ramatlotlo oa mokhatlo ha Motseki a ntse a behelletsoe ka thoko.
Ho sa le joalo, Leihlo la Basotho le nontse mofumahali Motseki maikutlo malebana le lengolo lena ‘me o itse litaba tseo ho thoeng o li entse lengolong ke mafosisa a reretsoeng ho mo senya lebitso.
“Tšenyo ea lebitso ha se ntho e ntle, ke se ke ba huletse makhotleng. Ramatlotlo oa LEPOSA o mong feela; ke ‘na. Ke makala ha ho kenngoa motho e mong (Hlaeng) ka ofising ea ramatlotlo empa ho se neheletsano ea mosebetsi.” O rialo a phethela ka hore mongoli-kakaretso o shebahala a kene ntoeng khahlanong le eena leha e ne e le motho eo neng a utloana haholo le eena.
