MOROETSANA OA ‘MOKOAO’ KHOTLA KA BOSHOLU
Ka Moipone Makhemeng
La 12 Pherekhong 2024
Makhala Tale (20) oa Lehlakeng, Koro-koro, Maseru ea hlalosoang a se na bolulo Maseru hoba a phela ka ho pata hlooho mek’huk’hung mapatlelong a teropo o hlahile khotla maobane ka lebaka la bosholu ba ho qhaka malapeng.
Nyeoe ea ngoanana e mametsoe ke ‘maseterata Itumeleng Letsika ha mochochisi oa e le mofumahali Rabale. Moqosuoa o qosoa ka liqoso tse peli tse tšoanang tsa ho qhaka matlo moo teng ho thoeng o ile a qhaka malapeng a mabeli.
‘Maseterata ha a balla moqosuoa qoso o behile ho eena hore ka la 11 Mphalane 2023 o ile a qhaka lelapeng la Kekeletso Makhalemele, Maseru West ‘me a utsoa libotlolo tse ‘ne tsa joala ba veini (wine), liteki (sneakers) tsa Adidas le masimba. Qosong ea bobeli ho thoe o ile a qheketsa ha Leonea Thetha, Hills view, Maseru.
Kamora ho balloa qoso ‘maseterata o ile a mo bolella hore o tla boela a hlaha hape khotla ka la 23 Pherekhong 2024, ka hona a re ke lona letsatsi leo a tlang ho ikopela beile ka lona.
