MAPOLESA A 13 A ‘NYAMETSE’
Ka moqolotsi oa rona
La 18 Mphalane 2023
Bookameli ba sepolesa sa Lesotho bo seboko ka hore mapolesa a leshome le metso e meraro (13) a nyametse mosebetsing kaha h’a sa itlaleha ho tloha ka khoeli ea Mphalane. Ho sa le joalo, mapolesa a tlalehoang a nyametse ke a ileng a khethoa ke bookameli hore a il’o ntšetsa lithuto pele lijunifesithing tsa Russia.
Mapolesa ao ke a latelang ‘me kaofela a sebetsa Maseru e toropong: Lance Sergeant Nkongoane, Lance Sergeant Mohlori, Lance Sergeant Loke, Police Constable Mahlaha, Police Constable Manyebutse, Police Constable Makama, Police Constable Mochekoane, Woman Police Constable Rantšo, Police Constable Mokejane, Woman Police Constable Mokhati, Woman Police Constable Lebitsa, Police Constable Leqhaoe le Woman Police Constable Lipholo.
Ho sa le joalo, Leihlo la Basotho le bone lengolo la bookameli ba sepolesa le neng le lokolla bao hore ba il’o etsa likopo tsa tumello ea ho ea sekolong (study leave) Lekaleng la Bosebeletsi ba Sechaba e le ho itokisetsa ho ea ithuta naheng ea Russia.
Tokomane e neng e lokolla bao ho ea batla study leave ea la 3 Mphalane 2023 e baleha joana ‘me e ne e ngolletsoe baokameli ba mapolesa ao moo a sebetsang: “O laeloa mona ho lokolla liofisiri tse ka tlas’a hau ho tloha ka la 5 Mphalane 2023 e le hore li il’o itokisetsa ho kopa tumello ea ho ithuta (Study Leave) naheng ea Russia.”
Ha litaba li le tjena, bookameli bo ngolletse bao hore ba ntse ba sa itlalehe mosebetsing ‘me ba ngolletsoe mangolo a ba laelang ho araba hore ke ka mabaka afe meputso ea bona e ke keng ea khaoloa kaha ba nyametse mosebetsing.
Lengolo le ngolletsoeng e mong oa bona le re: “U ile oa laeloa ho fana ka tse latelang ho bookameli ba sepolesa malebana le kopo ea hau ea study leave ho tsoa Lekaleng la Bosebeletsi ba Sechaba; lengolo le bontšang hore u il’o ithutela lengolo lefe le nako ea lithuto, bopaki ba maemo a mokoloto oa hau setsing sa lihlapiso (National Manpower Development Secretariat – NMDS), hore o tla tlatsa foromo e u lumellang ho ea sekolong hammoho le ho nehelana ka likopi tsa mangolo a hau a thuto.
“Hofihlela hajoale, ha oa itšoenya ho nehelana ka litokomane tsena kaofela ke ka hona u sa fuoang tumello ea ho ea sekolong (study leave). Ka bokhutšoane ha oa fuoa tumello ea ho ea sekolong hoba u hlotsoe ho ikobela litaelo tseo u li fuoeng.” Le baleha joalo lengolo.
Mookameli oa Sepolesa o re mapolesa a hae a nyametse
Le tsoela-pele hore mookameli oa sepolesa o tlalehetsoe hore bao ba nyametse mosebetsing ntle le tumello ea molao. Ho feta mona, beng ba mapolesa ao le bona ba re ha ba tsebe hore mapolesa ao a hokae.
“U qetetse ho fuoa tumello ea ho lokisetsa study leave ka la 3 Mphalane 2023. Tebello e ne e le hore ha u qeta ho etsa kopo ea study leave, u ne u tlameha ho khutlela mosebetsing ha taba tsa hau li ntse li lokisoa ke lekala le amehang ebe joale u lokolloa ka molao mosebetsing hore u ee sekolong, ha u qeta ho fuoa tumello ea ho ithuta.”
Bookameli bo re bao ba ngole mangolo ba hlalose mabaka a ka sitisang bookameli ho emisa meputso ea bona ekasitana le ho ba hulela komiting ea khalemo ka ho nyamela mosebetsing. Leihlo la Basotho le buisane le Raliphatlalatso oa Sepolesa Senior Superintendent Kabelo Halahala ho tšoaela litabeng tsena. O supile a sa li tsebe li e-s’o fihle tafoleng ea hae.
