LINOKOANE LI HLASELA BANKA E KHOLO
La 12 Tšitoe 2023
Banka e Kholo ea Lesotho (Central Bank of Lesotho – CBL) e re ho bile le tlhaselo e etsahetseng litšebeletsong tsa eona tsa marang-rang maobane. “Hang hoba Banka e ele hloko tlhaselo ena e mali-mabe e bakileng hore litšebeletso tsa eona tsa marang-rang li khinoe ha nakoana, Banka e ile ea tlola matjato ho etsa lipatlisiso ka sesosa sa eona.” Polelo ea Banka e baleha joalo.
Ho feta mona, CBL e khoba sechaba matšoafo hore boemo ba lichelete bo ntse bo bolokehile kamora tlhaselo ena. “Leha ho le joalo, sechaba se hlokomelisoa hore ho tla ba le tieho ho tse ling tsa litšebeletso tsa Banka. Sechaba se kopuoa ho khoba matšoafo ha tšebetso e ntse e etsoa ho khutlisetsa litšebeletso setloaeling.” CBL e rialo polelong e lokollotsoeng kajeno.
