MONNA KHOTLA KA PETO LE POLAO EA MOSALI
Ka Moipone Makhemeng
La 12 Tšitoe 2023
Monna oa Mosotho oa Motse-Mocha, Ha Mokhothu, Berea, Khaile Mokhele o hlahile lekhotleng le phahameng, Maseru a qosoa ka polao ea mosali eo a reng o ile a shoa a ntse a mo beta ka la 23 Tšitoe 2012. Qoso ea bobeli e mo tobileng ke hore o ile a hlasela mosali e mong ea ‘moneng ha a beta mosali ea ileng a timela.
Khaile Mokhele o qosoa ka peto le polao
Nyeoe e mametsoe ke moahloli Tšeliso Mokoko ha ‘muelli oa mofapa-hlooho e le Adv. Lehlanako Mofilikoane athe moqosuoa o buelloa ke Adv. Raboletse Makara. Paki e bileng lekhotleng ka la 6 Tšitoe 2023 e bile ‘Maseterata e Moholo oa Boroa (Southern Chief Magistrate) Manyathela Kolobe (53) eo moqosuoa a faneng ka boipolelo ho eena.
‘Maseterata Kolobe o ile a laeloa ho balla lekhotla maipolelo a moqosuoa leha ‘muelli oa hae a hanana le ‘ona.
“Boipolelo ka Khaile Mokhele, boo a bo entseng ka la 24 Tšitoe 2012 ha ‘maseterata Berea kapele ho ‘na ‘maseterata Kolobe. O ile a etsa boipolelo a pholile maikutlong le kelellong, a ba a botsoa lipotso ke ‘na ho utloa hore na h’a qobelloa ho etsa boipolelo ‘me a re h’a qobelloa kaha o batla ho etsa maipolelo kamor’a ho tšoaroa har’a mpa ea bosiu ka la 23 Tšitoe 2012:
“Ha a etsa maipolelo o itse: ‘Ka la 23 Tšitoe 2012, ke ne ke tloha joaleng moo ho bitsoang Lijekeng ke ea hae Motse-Mocha, Ha Mokhothu. Nako e ne e ka ba pakeng tsa 8pm le 8:30pm. Ke ile ka kopana le motho oa ‘m’e tseleng. Ke moo ke ileng ka ba le morero oa ho mo beta, eaba ke mo hlaha ka morao, kea mo khama.
‘Ke ile ka sebelisa matla ho theola borikhoe ba hae. Re ile ra oela fatše bobeli ba rona eaba kea mo beta. O ile a ntoma sefubeng eaba ke mo koaela ka sekipa sa ka mahlong hore a se ke a mpona. “Ke moo ke ileng ka bona a tsoa mali ka linkong eaba oa hlokahala! Ke moo mosali e mong a ileng a feta eaba ke nahana hore o bone ha ke beta masali eane e mong. Eaba ke ea ho eena ka fihla ka mo khama. O ile a etsa lerata eaba batho ba ea tla.
‘Ke ile ka baleha ke mo siea moo eaba ke il’o robala. Ke ne ke ile ka siea sekipa ho mosali eane eo ke mo betileng. Ke ile ka kena ka tlung ho robala. Ke moo bosiu ‘m’e le mapolesa ba ileng ba ntšoara.’ ‘Maseterata Kolobe o baletse lekhotla boipolelo ba moqosuoa joalo.
Adv. Raboletse Makara, ‘muelli oa moqosuoa
Ho sa le joalo, ‘muelli oa moqosuoa, Adv. Makara o ile a ema khahlanong le boipolelo bona ka le reng moqosuoa o bo entse a le tlas’a khatello ea litšoso le ho tšepisoa ho hong (reward). O re moqosuoa o ile a tšepisoa hore ha a ka etsa boipolelo, a ke ke a koalloa setokising ke mapolesa.
Ha boemo bo le tjena, ho bile le nyeoe kahara nyeoe moo ‘muelli oa moqosuoa a ileng a fuoa monyetla oa ho kholisa lekhotla hore efeela Mokhele a fane ka boipolelo a le tlas’a qobello le litšoso.
‘Maseterata Kolobe o lomahantse meno hore ha se ‘nete hore moqosuoa o fane ka boipolelo tlas’a litšoso. A re ha ‘melaelloa a fana ka boipolelo, bo etsoa ho ipapisitsoe le tokomane kapa tataiso ho ikholisa hore boipolelo bo fanoa ka boithaopo.
O teketse lekhotla hore pele a amohela maipolelo ho na le lipotso tse botsoang ‘melaelloa. Har’a tse ling ‘melaelloa oa botsoa hore na o qobelletsoe ho fana ka boipolelo kapa che? Na ho na le seo a se tšepisitsoeng kapa ho na le litlhaselo tseo a li etselitsoeng?
Ho feta mona, Kolobe o ile a hlalosa hore le eena ka mahlo oa ikholisa hore na ‘melaelloa o shebahala joang. Mohlala; o sheba hore na ‘melaelloa ha a ruruha har’a tse ling ‘me o re ha ‘melaelloa enoa a fana ka boipolelo ha ho se mo belaelitseng hore o ne a qobelletsoe ho fana ka bona.
Adv. Lehlanako Mofilikoane, ‘muelli oa mofapa-hlooho
Ho sa le joalo, khang ea Adv. Makara e bile hore na ‘maseterata Kolobe o ile a hlobolisa ‘melaelloa e le ho mo hlahloba ‘meleng hore na ha a na maqeba kapa ho ruruha. Karabo e bile che! kaha a fumane ho sa hlokahale ho mo hlobolisa hoba ‘melaelloa a boletse a sa khakhathoa ke sepolesa.
Lekhotla le ile la khefutsa ‘me nyeoe e tla tsoela-pele ho mamela bopaki ba mapolesa a ileng a tšoara moqosuoa.
