LETONA LA MEHLENG LE ‘HLOLOA’ HO LEFA SEKOLOTO SA BANKA
Ka moqolotsi oa rona
La 19 Pulungoana 2023
Mokhethoa oa mehleng oa Mafeteng ebile e le letona la mehleng, mohlomphehi Temeki Tšolo le mofumahali oa hae ‘Mamokhethi Tšolo ba matjaleng kaha Standard Lesotho Bank e ba hulanyelitse Lekhotleng le Phahameng. Banka e lla ka hore lelapa la Tšolo le ‘hlotsoe’ ho lefa sekoloto sa ntlo seo e reng mohlomphehi le mohats’ae ba hloloa ho se lefa kamora ho mo fa mokitlane oa khaho ea ntlo ea lelapa o mokaalo ka a M939,155 ka ‘Mesa 2013. Ho tlaleha koranta ea Lesotho Times.
Tšolo o ne a kalinngoe chelete eo ke banka nakong eo e neng e le letona la Khoebo le Mesebetsi e Meholo, Likoporasi le limmaraka. Ho ea ka banka, Tšolo o atlehile feela ho khutlisa karolo ea mokitlane e itseng empa hajoale o hloloa ho lefa sekoloto se setseng sa M755,232.41.
Banka e re Ts’olo o hlotsoe ho lefa ho tloha ka la 10 Phato 2023 ‘me chelete e ntse e setse e le sekoloto. Banka e batla hore lekhotla le laele Tšolo ho lefa sekoloto sena empa haeba a hloleha, e batla lekhotla le e lumelle ho fantisa setša sa hae se motseng oa Tšalitlama, Mafeteng. Pele a fuoa mokitlane, o ile a beha paneng setša seo.
Ho ea ka tumellano ea hae le banka, Tšolo o ne a lokela ho lefa mokoloto ona khoeli le khoeli ka ho lefa M9, 680.31 khoeli le khoeli ka lilemo tse 19, e leng likhoeli tse 228, e kenyellelitse tsoala.
“Ho ipapisitsoe le tumellano ea mokitlane ona e ileng ea tekeneloa ka la 4 ’Mesa 2023, Maseru moikarabelli o ile a beha paneng setša sa hae sa nomoro ea lisi ea 06464-31614 se mane motseng oa Tšalitlama, Mafeteng,” Banka e rialo lipampiring tsa lekhotla.
