BOPAKI BO HAROLANG POLAONG EA MOK’HANSELARA
Ka Moipone Makhemeng
La 14 Pulungoana 2023
Banna ba babeli le mosali ba hlahile lekhetlo la pele Lekhotleng le Phahameng Maseru maobane. Bona ba qosoa ka polao ea mok’hanselara oa Qalakheng, Mohale’s Hoek, mofu ‘Matokonye Marianah Senohe ea neng a fenethoe ka la 8 Mphalane 2019, motseng oa Qalakheng, Mohale’s Hoek.
Nyeoe e mametsoe ke moahloli ‘Mafelile Ralebese. Adv. Monate o buella moqosuoa oa pele, ha Adv. Thoahlane ‘muelloa oa hae e le moqosuoa oa bobeli. Moqosuoa oa boraro o buelloa ke Adv. Ketsi. Nyeoe e chochisoa ke Adv. Pelea Joala.
Baqosuoa ba tjametsoe ke liqoso tse peli, e leng ea polao ea motho ka maikemisetso le bosholu ba boqhobane ba ho utsoa M.470 le lifono tse tharo tsa meetso ea Nokia, Hisense le Sumsung.
Kamor’a ho balloa liqoso, baqosuoa bohle ba ile ba ipolela ba se molato liqosong ka bobeli. Baqosuoa ka tatellano oa pele ke Lehlohonolo Ranohe, oa Seforong, Quthing, Sebongile Letšaba oa Metsi-Masooana Ha Sechaba le Poulo Kulubane oa Ha Mokuoane, Taung.
‘Muelli oa mofapa-hlooho, Adv. Pelea Joala o hlalosa baqosuoa ba ile ba nyekenya mofu ka makhetlo ka thipa ea Okapi pele ba ikhapela thepa e boletsoeng. Moqosuoa oa bobeli (Sebongile) o ile a fana ka maipolelo ho sepolesa le ’maseterata ka morero oa bona oa bosholu o bileng oa tsoala polao.
Adv. Pelea Joala
Lekhotla le simollotse ka ho mamela nyeoe e nyane kahara nyeoe e kholo (trial within a trial). Lekhotla le batla ho ikholisa hore na baqosuoa ba entse maipolelo ka boithaopo kapa ba le tlasa tšusumetso ea mofuta ofe kapa ofe. Paki ea pele e bile Detective Sergeant Ramatsie ea itlhalositseng e le e mong oa bafuputsi ba nyeoe ena.
O re kamora ho fumana tlaleho ka botlokotsebe bo etsahetseng le ho etsa lipatlisiso, ba ile ba leba Ha Panta, Taung ka la 7 Pulungoana 2019 ho kopana le ‘Mamotšelisi Mokhatoe.
O re ‘Mamotšelisi o ba file tlhaloso ea hore baqosuoa ba ile ba fihla ha hae ba mo bolella hore ba na le mathata a lichelete. Ke moo Sebongile Letšaba e leng moqosuoa oa bobeli a ileng a ba bolella hore pela moo a neng a lula teng Qalakheng ho na le ‘m’e oa mok’hanselara ea hirisang chelete ebile o boloka le ea mokhatlo. ‘Mamotšelisi o boletse le eena e ne e le karolo ea morero empa a hloleha ho tsoela-pele ka lebaka la letsoalo.
‘Mamotšelisi o ile a bontša hore ba ile ba mo batla sethunya sa monna oa hae empa a ba latolela ka le reng ha a tsebe se kae. Paki e hlalosa hore Sebongile o ile a etsa maipolelo a mo lotomanyetsa kamoo ba phethileng morero oa bona ka teng. “O hlalositse Sebongile a ile a ea lapeng ha mofu, a ikhakantse sa mokana eka o il’o bolella mofu mathata a hae a hore eena le monn’ae ba na le likhohlano.
A hlalosa hore sepheo sa hae ho ea ha mofu e ne e le ho ea ithuta hore na mofu o lula le bo-mang. Nakong eo baqosuoa-‘moho le eena ba ne ba larile kantle kae-kae.” Detective Sergeant Ramatsie oa hlalosa. O re Sebongile o ile a ithuta hore mofu o lula le bana ba banyane ba babeli. H’a qeta ho ithuta maemo o ile a leba ka ntloaneng ho tsebisa bo-mphato oa hae ka mohala hore ba ka tsoela-pele ka mosebetsi.
“Kamora ho ba tsebisa, paki ea bobeli e ile ea khutlela ka tlung. Ke moo moqosuoa oa pele le oa bobeli ba ileng ba itšohlometsa ka tlung. Eaba moqosuoa oa bobeli o tsebisa mofu hore moqosuoa oa boraro ke moholoane oa hae eo e sa leng a leka ho kena lipakeng qakeng ea hae le monna.
Paki e re litaba li ile tsa fetoha eaba banna bao ba batla mofu chelete. Mofu o ile a bontša hore ha a na chelete, e teng e ka se fihle le ho M500. A hlolosa le hore karete ea hae e ha Modlokovana.
“Hona moo, moqosuoa oa boraro o ile a be se a mo khorohela a mo hlaba ka thipa makhetlo a fetang bonngoe.
“Moqosuoa oa boraro o ile a joetsa ba bang hore le bona ba nke thipa eo ba hlabe mofu hore litaba li se sallane le eena a le mong. Kahoo, le bona ba nka thipa ba mo hlaba makhetlo a fetang bonngoe.” Sergeant Matsie o pheta maipolelo a Sebongile.
Paki e hlalositse hore nakong eno moqosuoa oa bobeli o ile a nka bana a ba isa kamoreng e ‘ngoe. O teketse lekhotla hore kamora ketso e soto eo, ba ile ba ikhapela chelete e kaalo ka M470 le lifono tse tharo tsa mofu.
“Ha ba hlokomela hore mofu o lahlehetsoe ke bophelo ba ile ba tsoa ba matha, ba palama koloi ea bo-moqosuoa oa bobeli e tšoeu. Palehong ea bona, ba ile ba khutlela Taung ba ipata ha ‘Mamotšelisi matsatsi a seng makae. Ke moo ‘Mamotšelisi a ileng a ba le tšabo a re ba tsamaee ba tlohe hahae hoba batho ba tla beleaela ka boteng ba bona moo.
Detective Sergeant Ramatsie o re kamor’a ho mamela litaba tsa Sebongile ba ile ba utloa hore taba tsa hae ke maipolelo. O re ba ile ba mo botsa hore na o utloa a phuthulohile ho bolella ‘maseterata maipolelo ana ‘me a bontša ho se bothata.
Paki e re mapolesa a mabeli, Woman Police Constable Loko le Police Constable Monyane ba ile ba mo felehetsa ho ea fana ka maipolelo ho ‘maseterata oa Mohale’s Hoek ‘me ba khutla le eena.
Paki e re kamor’a ho fumana maipolelo a moqosuoa oa bobeli ba ile ba tsamaea le eena ho tšoara moqosuoa oa boraro ‘me ba mo fumana ha hae ba mo tšoara.
Paki e re ba ile ba mo hloma lipotso ka bosholu le polao tse etsahetseng Qalakheng. Ba ila ba batla thipa e bolaileng mofu.
Ho sa le joalo, moqosuoa o ile a mo bolella hore thipa eo o ile a e chesa a ba e lahla hammoho le masalla ‘ohle a eona. O bile a bontša mapolesa moo a cheselitseng thipa eo ka jareteng ea hae.
Moqosuoa oa boraro o boetse a nehelana ka lifono tse peli a li ntša ka kamoreng ea ho robala ha e ‘ngoe a ile a e theola marulelong moo a neng a e patile.
Paki e totobalitse hore tsena tsohle baqosuoa ba ne ba li pheta ba se tlas’a tšusumetso efe kapa efe esita le ho tšepisoa letho. O re ba ne ba boleletsoe litokelo tsohle tsa bona.
Ho feta mona paki e bontšitse moqosuoa oa boraro a ne a hlaphohetsoe a bontša e le motho ea phetseng hantle ‘meleng le kelellong. Mapolesa a boetse a romeloa ho tšoara moqosuoa oa pele.
