MOJAPELA O FUPUTSOA KA LIPELAELLO TSE THARO
Ka ‘Matlhohonolofatso Lebesa
La 18 Mphalane 2023
Kamora tšoaro ea mokhethoa oa Motete, Teboho Mojapela ebile e le moetapele oa Socialist Revolutionaries (SR), maparamente le baetapele ba mekha ea bohanyetsi ba ile ba bokana hekeng ea ntlo-kholo ea sepolesa ba batla ho tseba hore na Mojapela o tšoeroe ke sepolesa ka mabaka afe.
Ha ba ntse ba le moo, ba ile ba kopa ho kena kahare ho ea bona Mojapela ‘me ho ile hoa lumelloa moetapele oa Democratic Congress, Mathibeli Mokhothu, Prof. Nqosa Mahao oa Basotho Action Party har’a ba bang.
Ho khutleng hoa bona, moetapele oa bohanyetsi, mohlomphehi Mokhothu o ile a fana ka tlaleho. A re ba khobokane moo kamor’a hore moetapele oa SR a tšoaroe ho tloha ka hora ea pele mots’eare hofihlela nako e atamela hora ea botšelela.
Mokhothu oa hlalosa: “Taba eo re e fumaneng e le tlaleho ke hore ha mohlomphehi Mojapela a tšela ka lelibohong kamora ho tloha lapeng ha hae Ladybrand a ea paramenteng; ha a fihla mono ‘border gate’ o fihlile a nkoa ke sepolesa se sengata ebile se hlometse ka boima bo boholo.
“Kamora moo ba mo tlisitse mona Ntlo-Kholo ea sepolesa le balebeli ba hae ba babeli.” Ke Mokhothu a hlalosa.
“Tlhaloso eo ke e fuoang ka mane ka liofising ke sepolesa ke hore se ntse se etsa liphuputso.
“Ba se ba buile le molebeli a le mong joale o tsoile ba tla bua le e mong ebe ba tla bua le mohlomphehi Mojapela e le oa ho qetela.”
Mokhothu o tlalehile hore ba kopile akhente e tlo alosa boemo bona. A re tebello ke hore le eona sepolesa se tla ba le puo le eona.
O boetse a fana ka tlhahiso-leseling ka lintlha tse tharo tseo sepolesa se reng se fuputsa Mojapela ka tsona: “Ntlha ea pele eo moetapele oa SR a fuputsoang ka eona ke hore k’hamphani ea hae e tšehetsa ka lichelete tšebetso e ‘ngoe e seng molaong. Taba ea bobeli ke hore k’hamphani eo ea hae kae-kae Newcastle (Kwazulu-Natal) e ameha ka hore e na le thepa mono e akhang sethunya.
“Taba ea boraro ke hore lithunya tse fumanoeng ho balebeli ba hae kajeno le tsona ho na le litaba ka tsona.” Ke Mokhothu a fana ka tlaleho.
O itse o boetse a botsa sepolesa hore na Mojapela o il’o robala mapoleseng kapa che empa ba ‘muso ba sitoa ho mo fa ntlha.
Mokhothu o lihelletse likhala ka ho hlalosa hore ha moparamente a ea paramenteng, ho ea ka molao a ke ke a thijoa tseleng ke sepolesa, hoba maparamente a sirelelitsoe ka molao ho se sitisoi ho ea mosebetsing oa paramente.
“Leha moparamente a khutla paramenteng a ea hae a ke ke a thijoa ke sepolesa tseleng, ‘me hoo re se re ho siea matsohong a liakhente hore li re namolele.” Oa phethela.
