LESOTHO RED CROSS E FANA KA TLALEHO EA TŠEBETSO
Ka Moipone Makhemeng
La 3 Mphalane 2023
Komiti ea Mokhatlo oa Sefapano se Sefubelu Lesotho (Lesotho Red Cross Society – LRCS) e ile ea tšoara ‘moka oa bo-ralitaba ka Labone la la 28 Loetse 2023 moahong oa LRCS Maseru. Sepheo sa ‘moka e bile ho fana ka tlaleho mabapi le tšebetso ea mokhatlo ka kakaretso.
Mookameli oa LRCS, monghali Harry Nkhetše o hlalositse hore e le mokhatlo ba bitsitse bo-ralitaba ho ba beha leseling ka tema eo ba e khathileng. A re sena ke karolo ea boitlamo boo ba bo fihletseng kaha ba sa tsoa ba le seabo ‘mokeng oa PAN Africa, Kenya. O itse ba bone ho le bohlokoa ho khutlela sechabeng ba tlalehe tšebetso ea bona.
Maletsunyane Mpesa
Ha a fana ka tlaleho o behile sechaba leseling hore Motlotlehi Letsie III o filoe boemo ba ho ba ‘Hunger Champion’ ke ‘Mamekhatlo oa Mekhatlo oa Sefapano se Sefubeli (International Federation of Red Cross and Red Crescent Societies (IFRC).
O boetse a hlalosa hore tulong eo ba bileng le eona PAN Afrika, ba fihletse boitlamo ka lintlha tse hlano tse tlang ho latela:
“Ea pele ke ho sebeletsa ho nyolla tsela eo re ntseng re thusa sechaba ka eona. Ke taba e kholo ka hara mokhatlo. Re bone hore rea bonahala, ke ka hona le bonang re se re nkile mohato ona. Le hore re khutlele sechabeng.
“E ‘ngoe ke ho nyolla mokhoa oo Basotho ba ithaopang ka oona ka hare ho mokhatlo. Re tšoanela re etse bonnete ba hore ho na le makalana koana metseng moo lintho li etsahalang teng le moo Basotho ba phelang. Sena se tla thusa hore ha ho na le tlokotsi kapa koluoa ea mofuta ofe kapa ofe, Basotho ba ee moo ba thusane.” Nkhetše o hlalosa joalo.
Ho feta mona, Mookameli oa Mananeo, monghali Sechaba Mokhameleli o ile a hlalosa hore mokhatlo oa LRCS haufi o sa tsoa nehelana ka thuso ea liphahlo ho Basotho ba fetang 6,000 ba phelang Afrika Boroa kaha ba ne ba le tlokotsing ba hloka bolulo. O re batho bao ba ne ba hloka liaparo kamora hore matlo a bona a chesoe le hona ho heletsoa ke Ma-Afrika Boroa Pretoria le Rustenburg
Sechaba Mokhameleli, Mookameli oa Mananeo – Lesotho Red Cross Society
A re ke Basotho ba fetang likete tse hlano, ba phelang Rustenburg ‘me ho palo ena ho kenyeletsa malapa ‘me bongata ba bona ba kene lipetlele kaha ba amehile ke ‘mollo. Ho phethela, Mokhameleli, o boetse a fana ka liteboho ho Basotho ka tlatsetso eo ba ntseng ba e etsa ea ho nyehela lichelete mabokoseng a behiloeng menyako ea mabenkele.
O fane ka boipiletso hore ba tsoele-pele ho etsa tlatsetso eo kaha e tlisa phetoho e kholo bophelong ba ba tlokotsing.
“Ha le tsebe chelete ena e bohlokoa hakae. Chelete eno e re thusa hona hoo, ha motho a chelletsoe ke ntlo re se re qotsa ka moo, hape ha ho na le ngoana ea hlokang re ntse re qotsa hona mono.” O li beha joalo.
