PONTŠO EA LINTJA MASERU
La 18 Loetse 2023
Barui ba lintja ba ile ba khobokana mabaleng a Maseru Club lipontšong tsa lintja ka Moqebelo oa la 16 Loetse 2023. Lipontšong tsena ho bile le litlholisano moo lintja li hlolisaneng mekhahlelong e ‘maloa. Eona e bile ea malinyane, marakana, lintja tse bohareng le tse kholo joalo-joalo.
Monghali Ziyaad Issa o ne a khethuoe e le moahloli litlholisanong tsena ho tsoa Bloemfontein ‘me le eena ke morui ea hlahelletseng oa lintja hona Mangaung.
Ziyaad Issa, moahloli oa litlholisano
Issa o ile a hlalosetsa barui ba lintja hore ha ho ahloloa ho shejoa chebahalo ea lintja hore na li phetse hantle, ka tsela ea phepo le liente. Ho boetse ho hlahlojoa taolo le boitšoaro ba ntja hore na e ea laoleha. Moahloli o itse tabeng ea taolo ea lintja, barui ba lokela ho fasa lintja ka liropo le liketane tse nepahetseng.
“Re hloka ho bona ntja e laolehang, ha re batle ho bona lintja tse ntseng li khorohela tse ling mona lipontšong. Taba eno ha e ea nepahala koano. Ntja ea hau e lokela ho mamela, hape e be le setsoalle ho lintja tse ling le batho.” Issa o rialo.
Ka lehlakoreng le leng Leihlo la Basotho le buisane le e mong oa bahlophisi ba lipontšo monghali Lelimo Mokhotho. O hlalositse hore ba qalile ho tšoara lipontšo selemong sa 2018. A re sepheo sa lipontšo ke ho akofisa lerato la lintja ho Basotho. O itse ba ruta sechaba ka mefuta ea lintja e fapaneng joaloka Boerboel, Pitbull le tse ling.
“Re boetse re etsa tlhokomeliso ea tlhahiso ea lintja ka tsela ea nehelo le tsoaliso e ntlafalitsoeng ea lintja. Maikemisetso a rona a mang ke ho etsa letsoso ho Basotho ka ho ba ruta mokhoa oa phepo e lokelehang ea lintja. Re boetse re thusa sechaba ka thuto ea taolo ea lintja ka mokhoa oa khalemelo.
Lelimo Mokhotho, e mong oa bahlophisi ba ponts’o ea lintja.
“Taba ea bohlokoa e ‘ngoe ke ho nyolla khoebo ea lintja kaha morao tjena leruo la lintja le tsoaliso e se e le khoebo. Ho na le batho bao mosebetsi oa bona e leng ho rua lintja feela, e leng ho li reka le ho li rekisa.” Mokhotho oa hlalosa.
O supile hore ntlheng ea mefuta ea lintja tse amoheloang lipontšong, ba amohela lintja tsa mefuta eohle.
“Re amohela mefuta eohle ea lintja hobane koano Lesotho ha ho mofuta oa ntja o thibetsoeng ho ruuoa. Re amohela tse tona kapa tse tšehali le ho tloha ka malinyane a likhoeli li peli le lintja tse kholo. Ke supe hore kajeno ntja e kholo-kholo ke e nang le lilemo tse hlano.”
Shebella karolo ea lintja tse neng li le pontšong:
Tabeng ea seabo sa bona ho hlokomelisa sechaba ka bokotsi ba lintja o itse: “Ntja ha e hlokomeloa hantle, monga eona o tlameha ho e tsamaisa liente tse hlokehang ‘me hara linte ke ea bohlanya-ntja. Ntja e fuoeng liente tse nepahetseng leha e ka loma motho kapa phoofolo, e ke ke ea baka kotsi e ka bolaeang, leqeba leo le tla fola.
Leha ho le joalo, Mokhotho o itse ntja e sa hlokomeloeng ka liente, ha e ka loma motho mafu a eona a fetela ‘meleng oa motho hoo a ka hlahang kotsi a ba hlokahala.
“E le ho etsa tlhokomeliso ho barui ba lintja, meketeng e mengata re lula re memme lingaka tsa liphoofolo hore li hle li fane ka liente ho lintja hona mona joalokaha u li bona lingaka ke tsane mane li ntse li entela lintja khahlanong le lefu la bohlanya-ntja.” O rialo.
Moifo oa lefapha la lingaka tsa liphoofolo
O tobokelitse hore ente ea bohlanya-ntja e fanoa mahala. “Re lula re hlokomelisa batho hore ba ee lekaleng la temo ho fumanela litja tsa bona liente tsa bohlanya-ntja mahala.”
O phethetse litaba ka ho thathamisa batšehetsi ba lipontšo tsena. “Re tšehelitsoe haholo ‘me motšehetsi ea ka sehloohong ke Montego e leng k’hamphani ea bahlahisi ba lijo tsa lintja. Bona ba tlile tlas’a sekhele sa lebenkele le leholo la Sefalana. Ho na le batšehetsi ba bang joaloka Diverse logistics, LM Dogs, le batho ka bomong. Mona ke tla qolla ntate Jafta Thamae, eena ke morui oa lintja ‘me o ile a etsa bonnete ba hore leha a sa tle lipontšong kajeno, o ngolisitse lintja tsa hae tse robeli a re akhella M800.
“Re boetse re na le PG Glass, Hlabana DJ ekasitana le bo-ralifoto ba tlileng ho tla nka lintja lifoto tse ntle ho li bapatsa ho marang-rang. Ke etsa khoelehetso ho Basotho bohle hore malapa ’ohle a tlameha ho rua lintja; e ka ba ntja e nyane, e mahareng kapa e kholo. Ntja ke phoofolo e fanang ka tšireletso malapeng, ke motsoalle oa motho.
“Ha u na le ntja u ke ke oa tšoaroa ke ‘stress’ hohang. Molemo o mong oa ntja ke hore e fana ka boikarabello ho beng ba malapa. Bana malapeng ao ho nang le lintja ba ithuta boikarabelo ba tlhokomelo ka ho li fiella ekasitana le ho li fepa.
Karolo ea bahloli e eme tjena ka lifoto:
“Ha monga ntja a tsamaile oa tseba hore ha a lokele ho robala matsekela hoba o tlameha ho ea hae a tsebe ho ea fepa ntja ea hae.” O kobella joalo.
Ho sa le joalo, monghali Tlaba Mochebelele ho hlaha mokhatlong oa Farmers Pitso, o hlaloselitse ba neng ba le lipontšong hore bona e le mokhatlo ba na le mesebetsi e mene; oa pele a hlalosa e le ho tšoara lipitso kapa lithupelo tsa lihoai.
Tlaba Mochebelele, moemeli oa Farmers’ Pitso
A re ba boetse ba nka maeto a boithuto lipolasing le hohle moo ba nahanang hore ba ka ithuta ho tlisa phetoho tšebetsong ea lihoai. A re mokhahlelo o mong ke ho etsa lipontšo e le ho bapatsa lihlahisoa tsa lihoai tsa Basotho.
“Taba ea bone e kaholimo-limo-limo ke ho tlotla lihoai, ka ho li fa likhau tse li lokelang kamora ho etsa mesebetsi e metle ea temo le bohoai.” Mochebelele o rialo.
O phethetse ka hore ba tlile lipontšong ho tla etsa boithuto le ho tlabola selekane le barui ba lintja. A re ba batla ho sebetsa ‘moho le bahlophisi ba lipontšo tsa lintja. O boetse a thatiselletsa taba ea hore ba hlokometse hore bohlahisi ba lintja ke mosebetsi o moholo kahara sethala sa temo. A re kahona ba tlo sheba bahloli ba lintja hore ba tle ba tlotloe phanong ea likhau nakong e tlang.
