MAPOLESA A MANE (4) A TŠOEROE KA TJOTJO
Ka Moipone Makhemeng
La 21 Phato 2023
Litho tse ‘ne tsa sepolesa sa Lesotho (Lesotho Mounted Police Service -LMPS) tse sebetsang motebong oa Morija li hlahile ka pele ho ‘maseterata oa Maseru, Teboho Tapole le mochochisi Motiki kajeno li qosoa ka bobolu ba ho amohela tjotjo ea M19 000.00.
Baqosuoa ka tatellano ke ba latelang: Ralintši Makhakhe (41) oa Ha Makhakhe, Ha Seeiso, Matelile, Mafeteng, Pusetso Sello (42) oa Ha Mokhenene, Berea, Liteboho Ranthamane (47) oa Naleli Ha Rasetimela, Koalabata, Berea le Teboho Kanetsi (47) oa Maputsoe, Leribe.
Ho ea ka lengolo la qoso, baqosuoa ba le haufi le Masianokeng Lifestyle Centre ka maikemisetso le morero o tšoanang, ka la 28 ‘Mesa 2023 ba ile ba sitoa ho tšoara babelaelloa ba babeli ba nang le lithunya tse seng molaong ‘me ba amohela tjotjo ea M19,000.00 ho bona.
Ka ho etsa joalo, qoso e re ba tlotse litemana tsa 21 (1) hammoho le ea 34 tsa molao oa Thibelo ea Bobolu le Bomenemene oa 1999.
“Ka maikemisetso ba tseba hantle hore ke bahlanka ba ‘muso, baqosuoa kaofela ba ile ba lumellana ho amohela limpho e le masiba a limpshe eaba ba hloloa ho tšoara le ho koalla banna ba latelang: Tanki ‘Koleki’ Mabusela le Khauta ‘Khanokho’ Tšotetsi.
“Bone bo ile ba hloloa ho nka lithunya tsa bao tse seng molaong empa ba ikhethela ho amohela tjotjo ea bao e kaalo ka M19,000.00 ‘me ba tlola molao.” Lengolo la qoso le baleha joalo.
E mong oa babuelli ba baqosuoa, Adv. Mosuoe o ile a ba kopela beile ka hore ke litho tsa sepolesa ba ke ke ba baleha.
Adv. Motiki lebitsong la Bochochisi h’a ka hanyetsa kopo ea beile ‘me ‘maseterata Tapole a ba lokolla ka beile ea M2000 motho ka mong hammoho le ho lefa peheletso ea M6000 motho ka mong kapa ho beha paneng thepa ea boleng bo bokaalo.
Ba laetsoe ho se kena-kenane le lipatlisiso tsa sepolesa hammoho le ho tla khotla ha ba batloa. Ho sa le joalo, boholo ba sitiloe ho itefella ‘me kajeno ba il’o robala toronkong.
Ba tla hlaha hape khotla ka la 29 Phato 2023.
