LESOLE LE NYA MATSETE NYEOENG EA BO-MPHATO BA LONA
Ka Leihlo la Basotho
La 21 Phupu 2023
Masole a mane a qosoang ka teko ea polao ea mohlophisi oa Lesotho Times le Sunday Express, Lloyd Mutungamiri, ea ileng a thunngoa le ho lematsoa ka la 9 Phupu 2016 a bile lekhotleng la ‘maseterata maoba. ‘Ona ke Brigadier Rapele Mphaki, Colonel Khutlang Mochesane, Corporal Nyatso Tšoeunyane le Lance Corporal Maribe Nathane.
Eo e neng e le moqosuoa-‘moho le bona ea ileng a fetoloa paki-motšoaeli, Mahanyane Phusumane, o fane ka bopaki bo senolang morero oa bao ho tšosa Mutungamiri a tsekisoa hore o ngola hampe ka sesole.
Nyeoe e mametsoe ke ‘Maseterata Peter Murenzi athe mochochisi ke Adv. Rethabile Setlojoane. Adv. Karabo Mohau KC, Adv. Letuka Molati le Adv. Kabelo Letuka ba buella baqosuoa.
‘Maseterata o ile a hlalosetsa paki-motšoaeli hore e lokela ho fana ka bopaki ba ‘nete hape a e hlokomelisa hore bopaki ba leshano ha bo na amoheloa ke lekhotla.
Ha e fana ka bopaki e tataisoa ke mochochisi Adv. Setlojoane, paki e re ka 2016 boemo ba eona e ne e le ‘corporal’ ‘me ea supa hape hore e kene sesoleng ka 2003.
Mochochisi o ile e botsa hore na e tseba baqosuoa ba kapele ho lekhotla ‘me ea supa e ba tseba ’me ea ba hlalosa kaofela ka mabitso le maemo.
Lloyd Mutungamiri o bonts’a lekhotla moo likulo li ileng tsa kena mohlang a thunngoang [Images – Public Eye]
“O ile a bontša hore motho eo o hloka hore a khutsisoe ka hore a tšosoe feela. A re motho eno a ka tšosoa ka mokhoa oa mothunyo feela ho se ke hoa thunngoa eena, ho ka mpa hoa thunngoa haufi le eena.
“A bontša hore ho na le batho bao a seng a ba khethile ho phethahatsa morero ona. A re mission task oa ka specifically ke hore batho bao a seng a ba hloaile ke tle ke ba khannele koloi ke ba ise sebakeng se hloauoeng ke be ke ba khutlise ka koloi ea sesole eo ke neng ke e sebelisa ea 4×4, ea D4D e tšoeu ka ‘mala.” Phusumane o teka bopaki.
Mochochisi o ile a kopa paki ho otlolla hore na ha ho thoe Mutungamiri o ne a ngola hampe ka LDF, hantle o ne a etsa joang kapa a reng:
“Kaha ke motho eo ho thoeng oa ngola ho ne ho thoe o ngola hampe ka sesole e seng motho ea itseng.”
TSA MOHLA MUTUNGAMIRI A HLASELOANG
Pele re tsamaea ke ne ke lutse ka koloing pela liofisi tsa military intelligence ke lutse le moqosuoa oa bone ha ho fihla Corporal Tšoeunyane. O ile a fihla a nkile lithunya tse peli tsa moetso oa .38 Special, le mahlahahlela a leshome. A bua le moqosuoa oa bone hore ho na le thepa eo a tlileng le eona eo ba tla e sebelisa. ‘Na ke ne ke nkile sethunya sa ka sa 9mm.
“Re ile ra tsoa ka keiti ra nka direction e lebang Ha Thetsane. Ha re shebile sekeleng e pela Maseru Mall, ho na le koloi e ileng ea hlaha mono liofising tsa Lesotho Times leha ke sa nepe hore ke koloi ea mofuta ofe. Eaba ke laeloa ho sala koloi eo morao.
“Re ile ra latela tsela e il’o tsoa lekhalong la Katlehong empa ho bile le likoloi tse ling tse ileng tsa kenella ha ke ntse ke setse eane morao. Ha re theoha IEMS ka tlameha ho li seha tsebe. Ke fetile koloi ea ho qetela ke ntse ke li seha tsebe ho ea fihla lirobotong.
“Ke moo ke neng ke se ke sa tsebe hore na ha na koloi eane eo re neng re e setse morao e ne e le efeng. Ha ke le mono, Corporal Tšoeunyane o ile a re ke tsoe ka tsela e tsoang ka tlasa Iketsetseng pela NTTC. Eare ha ke le haufi le sekolo seo sa New Millennium ba ile ba re: ‘u ka re siea mona u tla ‘ne u tlo re lata kamora nakoana.’
“Ke Corporal Tšoeunyane ea ileng a re o tla mpontša hore na ke ba siee hokae. Ke ile ka ba siea moo ba ileng ba mpontša, ka ea sebakeng sa bo-Lekhaloaneng kaha ba ne ba sa bolela hore na ke khutle neng empa ke hakanya hore ke tsamaile 10-15 minutes.
Ha ke khutla ke ba fumane hona mono moo ke ba siileng teng, ba kena koloing ba re re ka khutla ra lo paka koloi.” Ke Phusumane a phethela bopaki ba hae.
