MELATA E TJAMELOA KE QOSO EA HO HOEBA KA THOKO HO MOLAO
Ka Moipone Makhemeng
La 13 Phupu 2023
Banna ba bahlano ba melata ba hlahile lekhotleng la ‘maseterata Maseru maobane ba qosoa ka lula naheng ea Lesotho ka thoko ho molao ekasitana le ho hoeba ba se na lipolomiti tse ba lumellang ho hoeba kahara naha. Hara bona ba bang ba qosoa hape ka ho hloka lipasa. Nyeoe e chochisoa ke mochochisi Ratšita athe ‘maseterata ke mohlomphehi Thabang Tapole.
Har’a baqosuoa e mong Lin Yong (52) oa China, lengolo la qoso le re ka la 10 Phupu 2023, Ha Matala, Maseru, ka thoko ho molao le ka maikemisetso o fumanoe a butse khoebo ea makoloi (Motor Freight Pty Ltd) a se na polomiti ea ho hoeba ebile e se moahi oa Lesotho.
Kamora ho balloa qoso, leqoetha la hae Adv. Thapelo Ntsiki o ile a mo kopela beile ea M500. Ha a beha thapeli ea beile o ile a supa hore eo ke e mong oa beng ba khoebo (shareholders) ea kompone e seng e boletsoe, kahona menyetla ea ho hlanola tlhabela e ea fokola. O boetse a lemosa lekhotla hore moqosuoa o se a entse kopo ea polomiti ea ho hoeba.
Kamora ho fana ka thapeli ena, mochochisi Ratšita o ile a bontša a se na khang le hore moqosuoa eo a fuoe beile kaha a nehelane ka pasa ea hae ea China ho sepolesa.
Ka ho tšoana, baqosuoa ba bang ba bane, MD Shahid, Mo’znh Mia, M Fahim le E.D Rashid ho hlaha Bangladesh ba shosholong. Ba qosoa ka ho sebetsa kahara naha ntle le tumello. Lengolo la qoso le re ka la 10 Phupu 2023, Ha ‘Nelese Maseru, ba ile ba fumanoa ba sebetsa ba se na lipolomiti tsa mosebetsi ekasitana le ho hloka lipasa. Kompone eo ba sebetsang ho eona ke Fosal Trading Enterprise (Pty) Ltd.
Ho feta mona, har’a baqosuoa, Mia o tjametsoe ke liqoso tse peli; ea ho hloka polomiti ea khoebo le ho hira baqosuoa ba bang bao e seng matsoalloa a Lesotho ka thoko ho molao.
Baqosuoa bana ‘muelli oa bona ke Adv. Rethabile Setlojoane. Kamora ho balloa liqoso o ile a ba kopela beile ea M500. A supa hore lipasa tsa bona li ile tsa utsuoa ke linokoane ka selemo sa 2022 khoeling ea Loetse nakong eo ba neng ba hlaseloa moo ba neng ba lula.
Setlojoane o teketse lekhotla hore lipasa li ile tsa batlisoa empa hofihlela joale ha li e-s’o fumanehe esita le tsona linokoane tseo. Adv. Setlojoane hape o bontšitse hore baqosuoa ba entse likopo tsa lipolomiti tsa ho hoeba kahara naha. O boetse a tekela lekhotla hore Mia o na le lelapa kaha a nyetse mosali oa Mosotho ‘me ba na le ngoana.
O boetse a supa hore o na le likhoebo tse hlano ka kakaretso, ka hona a ke ke a lahla likhoebo tseo le lelapa la hae a baleha. Mochochisi h’a ba le khanyetso mabapi le kopo ea beile empa a eletsa lekhotla hore baqosuoa ho be le seo ba se behang paneng kaha nyeoe ea bona e fapane le ea Yong ea nehelaneng ka pasa sepoleseng.
‘Maseterata o ile a nka qeto ea ho fa Mia beile ea M500 le ho beha paneng M5000. O ile a laeloa ho itlaleha ntlo-kholo ea sepolesa kamora libeke tse peli hofihlela nyeoe e lutse. Shahid le Fahim bona ba fuoe beile ea M500 le ho beha M1000 paneng.
