RFP E TŠOARA SEHOPOTSO SA MOFU OA EONA HA THETSANE
Ka Moipome Makhemeng
La 7 Phupu 2023
Mokha oa Revolution for Prosperity (RFP) o tšoere sehopotso sa bophelo ba setho sa oona, mofu ‘M’e ‘Mammako Lerotholi eo e neng e le mongoli oa lebatooa la Thetsane #34. Sehopotso se ne se tšoaretsoe sekolong se Phahameng sa Thetsane High School, maobane.
Mofu ‘M’e ‘Mammako Lerotholi e ne e le mongoli oa lebatooa la Thetsane mokheng oa RFP
Ea buileng e le mooki, Monghali Khotso Johane o hlalositse hore mofu o timetse ka lebaka lefu la tsoekere. O bontšitse hore ha lefu le qala ho itlhahisa, mofu o qalile a khathala, a bile a katleha manonyeletso. Molekane oa hae o ile a mo nkela kalafong ‘me hoa etsoa liteko tsohle tsa mathomo ntle le tsoekere.
Mooki o re khabareng kamora ho etsa liteko tsohle, ngaka e ile ea qetella e hlahlobile lefu la tsoekere ‘me ea fumana hore e teng ‘me mokuli a fuoa litlhare hang-hang.
“Tsoekere e mo nkile feela matsatsi a mabeli eaba Laboraro oa hlokahala. O ile a phahama a re o leba ntlong ea boikhutso empa ke moo a ileng a oela fatše eaba ke phetho.” O phethela joalo. Mofu o siea molekane le bara ba bane.
Mooki, Khotso Johane o re mofu o timetse ka lebaka la lefu la tsoekere
Ka lehlakoreng le leng, litho tsa RFP li ile tsa fuoa monyetla oa ho fetisa matšeliso. Har’a tsona e bile monghali Sekake Chaole. Eena o hlalositse mofu ka tsela e lateleng.
“‘M’e ‘Mammako re mo tsebile ha ntate Sam a qala letšolo. Re mo tsebile e le ‘m’e ea lerato ea lulang a thabile. Ka hona re tšelisa lelapa le litho tsa Letšolo. Ka ho fetisisa re tšelisa mothehi oa letšolo ntate Sam Matekane. Rea tseba o hlabehile haholo ka tahlehelo ea setho se matla sena. Le uena mokhethoa rea u tšelisa.” O rialo.
Mokhoethoa oa lebatooa la Thetsane, Nthati Moorosi o fana ka mats’eliso
Qetellong mongoli e moholo oa RFP ebile e le mokhethoa oa lebatooa la Thetsane, Mohlomphehi Nthati Moorosi o ile a fana ka puo ‘me eena a li beha tjena;
“Bo-‘m’e ke lahlehetsoe; mona ho oele lesole har’a masole. ‘M’e ‘Mammako ke mo tsebile a sa ntsane a entse car wash ka Ha Thetsane ka mona. Ke ne ke sa tsebe le lebitso la hae ke bona e le ‘m’e ea monate. Ra boela ra kopana lipolotiking maemong a neng a tsitsipane haholo.” Moorosi o hlalosa ka moo a tsebileng mofu ka teng.
O tsoetse-pele ho hlalosa leeto la bona ho tloha nakong ea likhetho hofihlela moo lefu le mo khaoletsang. “Ha re kopana eaba o re ho ‘na, ‘ke na le ‘mapa ‘m’e hore na re tlo sebetsa joang. Re tla qala mane u il’o kopana le likomiti tsohle tsa mabatooa.’ Ha e le hantle o ne a ntataisa hobane lipolotiki ha se ntho tseo ke li tsebang ho ‘na ho ne ho re tšo!
Boha lits’oants’o tse ling ka tlaase
monghali Sekake Chaole
Mokhethoa o fana ka mats'eliso
Litho tsa RFP
Litho tsa RFP
Litho tsa RFP
“Joale ke ‘na enoa ke ea fihla ke mantsiboea, eaba ke tsitsipane. Eaba ‘m’e ‘Mammako o tsamaisa phutheho eno ka utloa ha room e ntse e futhumala. Ka tloha mono ke utloile ha ke amohelehile. Empa ka tseba hore ha rea tloha mono re hapile pelo ea motho e mong le e mong.
“O ile a ‘na a ruta batho ka ‘na. Leeto leo re le tsamaileng re le nkile a ntse a le pel’a ka mona a ntse a tsoa le mona a kena le mona.”
“Eaba re sebelitse joalo hofihlela the moment of victory. Eaba re sebetsa le eena ofising mane. O ile a re ruta mosebetsi kaofela mosebetsing mane, bo-ntate Rapapa le bohle.”
Ha a phethela, Moorosi o ile a tšelisa lelapa ‘me a bontša hore bana ba mofu nako eohle ha ba batla ho bua le motho oa ‘m’e o teng ka linako tsohle. A boela a tšelisa le litho tsohle tsa RFP ka tahlehelo ena.
Mofu o tla bolokoa hosane – la 8 Phupu 2023, Ha Thetsane.
