MOJAPELA O FA BACHA MOROLO
… KA HO BA PHETALA LEETO LA BOPHELO BA HAE
Ka Moipone Makhemeng
La 1 Phupu 2023
Moetapele oa Lekhotla la Kanana ea Basotho (Socialist Revolutionaries – SR) ebile e le mokhethoa oa lebatooa la Motete, Adv.Teboho Mojapela, maobane o ile a bokanya bacha ba naha ea Lesotho hoteleng ea Lancer’s Inn, Maseru e le ho ba fa thuto ka khoebo le polotiki molemong oa kholo ea bona.
Mojapele o khothile seotlo ka ho fana ka nalane ea bophelo ba hae. O hlalositse hore o hlahile ka selemo sa 1969 a hlahela seterekeng sa Mokhotlong. A kena sekolo se phahameng St. James High School, Mokhotlong. Ho tloha moo a leba Thabeng High School. Kamora ho phethela lithuto likolong tse mahareng, Lebaibai o ile a ea National University of Lesotho a ithutela molao – Bachelor of Arts in Law (BA Law).
O ile a bolella bacha hore sepheo sa ’moka ke ho tla fa bacha tšepo le morolo ho ba tataisetsa bokamosong bo chabile. O boetse a phuthullela bacha nalane ea leeto la khoebo ea hae – JP Financial Services.
Bacha ba mametse Adv. Mojapela ka hloko
“Ntate e ne e le molisana a sa kena sekolo. Ka letsatsi le leng ha re ntse re lutse mollong ke ne ke re ha ke hola ke tlo ba le chelete e ngata ea lipampiri. What I am saying is allow yourself to dream. Joale ntate a mpotsa na ke tlo e nka kae chelete e ngata, ka fetola ka hore ke bona mokotla oa 80kg o nkemetse thoteng mane.”
Mojapela o supa hore ka selemo sa 1989 ha a le lilemo li mashome a mabeli o ile a ea sebetsa merafong Afrika Boroa moo ntate oa hae a neng a sebetsa ‘me o re le eena o ne a sebetsa ka mokoting.
O boleletse bacha hore o sebelitse merafong ea Afrika Boroa nakong e boima ea khethollo ea ‘mala (apartheid) maburu a ba loantša.
“Ke ne ke sa lumele bohatelli joale ke loana le ‘ona Maburu ana ‘me ka tlameha ho khutlela Lesotho, ke nyahlalitse mosebetsi e se hobane ke tebetsoe.
“Ha ke fihla Lesotho ke ile ka sebetsa Highlands ke khola M400. Kaha chelete ena e ne e le nyane, ‘na le bo-mphato oa ka re ne re boetse re e seba. Ka lebaka la hore ke ne ke sa rate banana ebile ke sa noe joala, ke ne ke lula ke na le chelete bona ba se na eona. Joale ho na le motsoalle e mong a rata ho lula a kalima M50. Eaba neng-neng kea khathala ka re a e khutlise e na le tsoala. That’s when JP was born, ke ne ke sa e rera.
“Ka selemo sa 1993 ka tlohela mosebetsi ka ea sekolong ‘me khoebo ea oela ha ke le junifesithi. Ka nako ena ke ne ke na le bana le mofumahali. Re ne re na le bothata ba chelete kahona ka tlohela sekolo. Ke ile ka kalima lichelete ho batho ba bang ka e hirisa ‘me ka ba le cheletenya.”
Ho tsoela-pele, mohlomphehi o bontšitse hore ka selemo sa 1998 o ile a boela junifesithi ho phethela BA Law ‘me khoebo e ile ea boela ea oela. Leha ho le joalo, o bontša hore ha a ka ba nyahama ha e ntse e oela.
“Mohale o tsoa maroleng. Ha u le mohoebi, taba ea pele; hore na u etsa phaello ea M50 ka letsatsi chelete eo u loketse u e arole hararo. Ho be le ea inshorense ‘me o e arole hararo. E-be ka long term, medium term le short term hoba tlhokahalo ea chelete e lula e le teng. ”
LEETO LA POLOTIKI LEO MOJAPELA A LE TSAMAILENG
Mojapela o bontšitse hore o hotse e le ngoana Lehata-‘Moho kapa Lek’honkerese. O re ka selemo sa 1993 ha Basotho Congress Party (BCP) e hapa mabatooa kaofela likhethong o ile a ba karolo ea bona empa ka bomali-mabe o re le bona ha ba busa ba ile ba bola joaloka Manasi.
“Ka oona motsotso oo ka hlapa matsoho ka nena Mak’honkerese. Ba bang ba lona le khomaretse mekha ea lona e khenathetseng. Manasi a re senyelitse naha empa Mak’honkerese a e qetetse.” Oa hlalosa.
Ha a hatela pele a tekela bacha hore pusong ea Mak’honkerese ho ile hoa ba le letšolo leo ho neng ho bolaoa batho. O re le eena o ne a le lethathamong la ba tlo bolaoa kahona a balehela Port Elizabeth moo le teng a ahileng teng. O re o boetse o ahile Ladybrand.
“Re lokela ho ema re loantše sera sena sa polotiki. Tlohellang ho ikana ka litšila hobane li ja ho lona.” O rialo a hlokomelisa bacha hore ba se khomarele mekha leha ba hlokomela litšila tsa baeta-pele ba mekha e joalo.
Ka 2006 ha mokha oa Kobotata ea Basotho (All Basotho Convention – ABC) o thehoa o supile hore e ne e le e mong oa balateli ba ABC. O re o ne a rata mothehi oa ABC, ntate Tom Thabane, a mo shebile a le hole hobane o ne a sa rate bosholu. O re empa ha e se e le karolo ea bona, eitse ha a sheba a bona hore joale mona ke masholu-sholu. ‘Me a tlohela polotiki a emella thoko hofihlela a theha mokha oa hae oa SR.
“Ke kopa ka boikokobetso re qaleng bophelo bo bocha. Polotiki lona bacha le rata hore ha le e rate, empa hore na le ea e rata kapa ha le e rate e ea le ama; hore na lea khetha kapa ha le khethe, e ea le ama.” O bua ka matla le bacha.
Qetellong Mojapela o bile a bontša hore ha moruo o nyotobela ho qaleha bohlola sechabeng kaha lela le lapileng le se na tsebe. A ipiletsa hore bacha ba ikeletse hore kholumo-lumo ena ba e loantše.
“Ha re sa nke karolo re neha mamene-mene monyetla. Leha re ka bua ka khoebo, ha polotiki e na le mathata re tlo oela. Khoebo e batla sebaka seo polotiki ea teng e lokileng.”
Mokhethoa oa Motete o kobelletse litaba tsa hae ka hore ke qaleho ea hae ho tsoela-pele ho ruta bacha polotiki empa sena ha a se etse ho kopa menoana ea bona empa o lakatsa bacha ba ruoe tsebo. O re ha ba ruile tsebo ba tla tseba makhabane a moetapele ea lokileng. A menyeletsa maritsa ka hore sena se tla ba ruta ho etsa liqeto tse nepahetseng kamoso ha ba khetha.
