O RIBOLLA TABA TŠOARONG EA BABELAELLOA POLAONG EA JOKI
La 22 Phuptjane 2023
Moetapele oa Basotho National Party (BNP), Machesetsa Mofomobe o utullotse taba eo a reng e patiloe tšoarong ea babelaelloa polaong ea seboholi Ralikonelo Joki. O boetse o re taba ena e pepesitse tšebetso e mpe ea leeme la sepolesa sa Lesotho tšebetsong ea lipatlisiso tsa mafu a batho.
Babelaelloa ba tšoeroeng ke Sootho Liphoto (35) oa Mokema ea lulang Ha Abia, Kamo Phakoe (35) oa Jorodane, Ha Rapokolana ea lulang Mokema le Qoaling le Mothusi Tlelase (31) oa Mokema Koro-Koro ba ile ba tšoaroa mesong ea maobane ba kena lelibohong la Maseru hammoho le monna e mong eo sepolesa se reng ke ramophato.
Babelaelloa ba babeli ho bao, Liphoto le Tlelase ba boetse ba belaelloa polaong ea ofisiri ea paramente ea Lesotho, mofu Mothibe Mothibe hammoho le kharebe ea hae, Thomello Ntsane ba neng ba thunyetsoe lefu Mokema bosiung ba la 20 Motšeanong 2023.
Ho sa le joalo, monghali Mofomobe o utullotse hore na hobaneng lipatlisiso le tšoaro ea babelaelloa li entsoe kapele.
A bua ‘mokeng oa baphalatsi ba litaba maobane BNP Centre, Maseru, Mofomobe qetellong ea puo ea hae o re sepolesa se sekame mabapi le ho batla linyeoe: “Ke batla ho leboha mapolesa a Lesotho ka ho etsa lipatlisiso tsa babolai ba Leqhashasha kapele ho feta kamoo ho neng ho lokeleha.
“Taba ena e tlo khutlisa tšepo le seriti sa Basotho ho sepolesa kaha tšepo ea bona ho sepolesa e ne e se e khoehla. Ho tšoaroa hoa babelaelloa bana ho tla etsa hore mekhatlo ea machaba e ileng ea ngola e le mengata ho nyatsa polao ea Leqhashasha kaha ebile ea etsa kopo e potlakileng hore babelaelloa ba monna eo ba tšoaroe, le eona e tla ba le tšepo ho sepolesa sa Lesotho.
Koloi ea mofu Mothibe e masoba a likulo – Foto – Facebook
“Kea tseba hore ba bangata ba lona ha le tsebe taba ena eo ke tlo e bua; empa ke batla ho le joetsa eona. Lipatlisiso tsa sepolesa ha li ea lokela ho sheba hore na motho ke mang.
“Matla ao sepolesa se a fuoeng hore se batle linyeoe, ekakhona ho se shejoe hore motho ke mang kahara sechaba. Ke etsa mohlala; haeba ‘m’e a ka bolaoa Thibella mono ‘me joale e se motho ea hlahelletseng ka mahetla sechabeng na ke ho bolela hore nyeoe ea hae e nkoe hanyenyane?
“Ha re tlohelleng ea Leqhashasha, motho (Thomello Ntsane) ea bolauoeng Mokema le Mothibe ke khaitseli ea Motlatsi e mong oa Mookameli oa Sepolesa (Assistant Commissioner of Police).
Machesetsa Mofomobe
“Ke re motho ea bolaetsoeng Mokema le Mothibe ke khaitseli ea Assistant Commissioner of Police. Na hore lipatlisiso li be teng ke lokela ho ba khaitseli kapa moholoane oa Assistant Commissioner of Police? Kapa molaoli oa sesole? Kapa oa Oros (Mohlomphehi Mofomobe o bitsa mookameli oa mautloela joalo) kapa LCS hore nyeoe ea ka e batloe kapele?
“Na ho tlameha ho be joalo? Leha ho le joalo, ke thoholetsa sepolesa tšebetsong eo se e entseng. Ke utloile ba bang ba ntse ba ipotsa hore bao ba tšoeroe joang, that is none of your business; ho teng ke hore ba tšoeroe. Ho setseng ke hore ba isoe makhotleng oona a sebetse ka bona.”Ke Mofomobe a bile a bontša hore tšoaro ea babelaelloa e tlositse senyopotsi le sekhobo seo a ileng a se jarisoa ke hlooho ea mautloela ka ho mo supa e le e mong oa babelaelloa pejana.
“Rona ba BNP re thabile ‘me le batho bane ba 315 ba nkhethileng ba thabile.” Mofomobe o menyeletsa maritsa joalo.
